कुकुरको सहायतामा २ सातापछि पक्राउ गरियो पेन्सिलभेनिया जेलबाट फरार खतरनाक कैदी
प्रकाशित मिति : भाद्र २७, २०८० बुधबार
झण्डै २ साता अगाडि अमेरिकाको पेन्सिलभेनिया जेलबाट फरार हत्यामा दोषी अत्यन्त खतरनाक कैदी डानेलो काभाल्कान्चीलाई नियन्त्रणमा लिइएको छ । पेन्सिलभेनिया राज्य प्रहरीले काभाल्कान्चीलाई बुधबार हिराशतमा लिएको घोषणा गरेको हो । खोजीका लागि सयौं अधिकारीहरू परिचालन गरिएको थियो भने वरपरका समुदाय त्रसित बनेका थिए ।
चेस्टर काउन्टीमा बुधबार बिहान ८ बजेतिर ड्यानिलो काभाल्कान्चीको नाटकीय नियन्त्रणमा एउटा विमान, एक प्रहरी कुकुर र २० भन्दा बढी अधिकारीहरू परिचालन गरिएको थियो । राती खोज क्षेत्र माथि उडिरहेको विमानले जमिनमा तातो संकेत पाएको थियो । तर आँधिका कारण खोजी अवरुद्ध भएको थियो । विहान अधिकारीहरुको टोलीले उक्त क्षेत्र सुरक्षित घेरा हालेको थियो ।
काभाल्कान्ची सुतिरहेको बेला प्रहरीले नियन्त्रणमा लिएको थियो । नजिकैका बासिन्दाबाट चोरेको राइफल माथि सुतिरहेको अवस्थामा प्रहरीले फेला पारेको थियो। अधिकारीहरु पुग्दा काभाल्कान्ची अचम्ममा परेको र हातमा राइफल लिएर क्रल गरेर भाग्न खोजेको प्रहरीको भनाई छ । राइफल प्रयोग गर्नबाट रोक्न एउटा प्रहरी कुकुर छाडिएको थियो भने प्रहरीको कुकुरले टोकेपछि हिरासतमा लिइएको थियो ।
काभाल्कान्ची अपमानजनक रुपमा प्रस्तुत भएको र गिरफ्तारीको प्रतिरोध गरेको तथा कुकुरले उसलाई टाउकोमा घाउ लगाएर छोडेको प्रहरीको भनाई छ । जब कुकुर उसको छेउमा पुग्यो, तब उसले प्रतिरोध गरेपनि कुकुरले रोक्न सकेको जनाइएको छ । कब्जा पछि उसलाई हतकडी लगाइएको थियो भने एक दर्जन भन्दा बढी भारी हतियारधारी अधिकारीहरूको सशस्त्र टोलीले गाडीको पछाडि राखेर लगेको थियो ।
काभाल्कान्चीको अनुहारमा रगत थियो । उसले गाढा प्यान्ट र फिलाडेल्फिया ईगल हुडी लगाएको थियो । कैयौं अधिकारीहरूले काभाल्कान्ची र राइफलसँग सामूहिक फोटो खिचेका थिए । कब्जाको क्रममा अरू कोही पनि घाइते भएनन् ।
दिनदहाडै आफ्नी पूर्व प्रेमिकालाई छुरा प्रहार गरेरेर हत्या गरेको अभियोगमा दोषी काभाल्कान्ची अमेरिकाको पेन्सिलभेनियाको जेलबाट भागेपछि त्रास फैलिएको थियो । २ साता अगाडि बिहीबार बिहान ८ बजेर ५० मिनेटमा पोकोप्सन टाउनशिपको चेस्टर काउन्टी जेलबाट भागेको ३४ वर्षीय डानेलो काभाल्कान्चीको खोजी भइरहेको थियो ।
काभाल्कान्चीलाई सन् २०२१ मा आफ्नी पूर्व प्रेमिकालाई उनका दुई साना छोराछोरीको अगाडि ३८ पटक छुरा प्रहार गरेर हत्या गरेकोमा अगस्ट १६ मा फर्स्ट डिग्री हत्याको दोषी ठहर गरिएको थियो । सन् २०१७ मा काभाल्कान्टको जन्मभूमि ब्राजिलमा भएको उक्त हत्यापछि पक्राउ वारेन्ट जारी गरिएको थियो।
घातक छुरा प्रहारको लागि काभाल्कान्चीलाई बिना परोल आजीवन कारावासको सजाय सुनाइएको थियो । र चार हप्तामा राज्यको जेलमा सार्ने तयारी गरिएको थियो । दिनको उज्यालोमा दुई बच्चाहरूको अगाडि आमाको हत्यामा संलग्न भइसकेको व्यक्तिलाई यो भन्दा ठूलो केहि गर्नबाट केहीले पनि नरोक्ने भन्दै अधिकारीहरुले डर व्यक्त गरेका थिए ।
खोजीका लागि क्यानाइन एकाइहरू, ड्रोन र हेलिकप्टरहरू खोजीमा तैनाथ गरिएको थियो, जसमा चेस्टर काउन्टी डिटेक्टिभहरु, पेन्सिलभेनिया राज्य पुलिस र यूएस मार्शल सेवा सहित कानून प्रवर्तन एजेन्सीहरू समावेश थिए । चेस्टर काउन्टी र यूएस मार्शलहरूले यस मामलामा संयुक्तरुपमा १० हजार डलर इनामको घोषणा समेत गरेका थिए ।
चेस्टर काउन्टीको फिनिक्सभिल क्षेत्रमा काभाल्कान्चीको परिवार रहेको छ । काभाल्कान्चीलाई भर्जिनियामा पक्राउ गर्नु अघि २०२१ को छुरा प्रहार पछि भाग्न परिवार र साथीहरूले सहयोग गरेको विश्वास गरिएको थियो ।