प्रतिष्ठित इसा अवार्डबाट डा. सन्दुक रुइतले पाएको दश लाख डलर पुरस्कारमा कर छुट
प्रकाशित मिति : असार ४, २०८० सोमबार
सरकारले डा. सन्दुक रुइतले पाएको पुरस्कारमा कर छुट दिने भएको छ । गृह मन्त्रालयले सोमबार राजपत्रमा सूचना प्रकाशित गर्दै डा. रुइतले बहराइनबाट पाएको दश लाख अमेरिकी डलर (करिब १३ करोड नेपाली रुपैयाँ) मा कर छुट दिने निर्णय गरेको हो ।
सरकारले आर्थिक ऐन २०७९ को दफा १८ को उपदफा (१) ले दिएको अधिकारलाई प्रयोग गर्दै गत फागुन ११ मा रुइतले पाउने पुरस्कारमा कर छुट दिने निर्णय भएको राजपत्रमा उल्लेख छ ।
नेत्र चिकित्सक रुइतले गत फागुन प्रतिष्ठित इसा अवार्ड प्राप्त गरेका थिए । बहराइनका राजा शेख हमद बिन इसा अल खालिफा ‘अनररी प्रेसिडेन्ट’ रहेको ‘इसा अवार्ड फर सर्भिस टु ह्युमानिटी’ संस्थाले सन् २००९ मा स्थापना भएर सन् २०१३ देखि यो अवार्ड प्रदान गर्दै आएको छ । अवार्डको पाँचौं संस्करण–सन् २०२३ मा डा. रुइतलाई उक्त पुरस्कार घोषणा गरिएको हो ।
बहराइनका पूर्वराजा सेख इसा बिन सलमान अल खालिफाको नाममा स्थापित उक्त पुरस्कार हरेक दुई वर्षमा संसारभरबाट मानव कल्याणको क्षेत्रमा क्रियाशील व्यक्ति वा संस्थालाई प्रदान गरिदैँ आइएको छ ।