नेपाली आकाशमा उडिरहेको जहाजभित्र इन्टरनेट चलाउन पाइने, वायुसेवा कम्पनीका लागि यस्ता छन् शर्त
प्रकाशित मिति : माघ २९, २०७९ आईतबार
नेपाल दुरसञ्चार प्राधिकरणले नेपाली आकाशमा उडिरहेको हवाई जहाजभित्र इन्टरनेट चलाउन पाइने व्यवस्था ल्याएको छ । प्राधिकरणले इनफ्लाइट कम्युनिकेसन (आईएफसी) सर्भिस सञ्चालनसम्बन्धी निर्देशिका जारी गर्दै नेपालको आकाशमा उडान गर्ने हवाई सेवाप्रदायकले उडानका क्रममा सञ्चार सेवा उपलब्ध गराउन पाउने बाटो खुला गरेको हो ।
उक्त सेवा लिन वायुसेवा कम्पनीहरुले प्राधिकरणले तोकेको शर्त पुरा गर्नुपर्नेछ । यो सेव जडान गरेसँगै उडानकै क्रममा यात्रुले मोबाइल तथा इन्टरनेट सेवा उपयोग गर्न पाउनेछन् । अनुमति प्राप्त सेवाप्रदायकले नेपालको आकाशमा उडानका क्रममा सञ्चार सेवा उपलब्ध गराउन चाहने स्वदेशी तथा विदेशी हवाई सेवाप्रदायकलाई त्यस्तो सेवा उपलब्ध गराउन सक्नेछन् ।
प्राधिकरणले जारी गरेको निर्देशिकाअनुसार १० हजार फिटमाथि उडान गरिरहेको र अवरोध नहुने अवस्थामा मात्र त्यस्तो सञ्चार सेवा उपलब्ध गराउन पाइनेछ । त्यसभन्दा कम उचाइको उडानमा भने यात्रुका लागि यस्तो सेवा प्रतिबन्ध गरिएको छ । साथै, ट्याक्सिङ, उडान वा अवतरणको समयमा पनि यो सेवा उपयोग गर्न पाइनेछैन् । कानुनी रूपमा दर्ता भएका स्वदेशी अथवा विदेशी दुवै किसिमका सेवाप्रदायकले यस्तो सेवा उपलब्ध गराउन सक्ने निर्देशीकामा उल्लेख छ ।
नेपालमा दर्ता भएका विमानमा आईएफसी सेवा उपलब्ध गराउन चाहने नेपालका वायुसेवा कम्पनीले आफूले कस्तो सेवा प्रदान गर्न चाहेको सो बारे खुलाएर निवेदन दिने सक्ने भएका छन् । आईएफसी सेवा प्रदायकबारे जानकारी, एयरलाइन्स र आईएफसी सेवा प्रदायक कम्पनी बीचको समझदारी, नेपाल नागरिक उड्डयन प्राधिकरणबाट सिफारिस पत्र, अन्य आवश्यक कागजात नेपाल दूरसञ्चार प्राधिकरणमा बुझाउनुपर्नेछ ।
त्यस्तै सेवाप्रदायकको हकमा भने सञ्चार सुविधा उपलब्ध गराउन स्याटेलाइट सेवा प्रदायकसँग सम्झौता गरेको हुनुपर्नेछ । सेवाप्रदायकले हवाईजहाजभित्र कुनै किसिमको उपकरण जडान गर्नुपर्ने अवस्थामा भने नेपाल नागरिक उड्डयन प्राधिकरणबाट अनुमति लिएको हुनुपर्नेछ । यसअघि सरकारले गरेको निर्णय कार्यान्वयन गर्न प्राधिकरणले निर्देशिका जारी गरेको हो ।
नेपाली आकाशमा इन्टरनेट सञ्चालन गर्न दुई विदेशी इन्टरनेट सेवा प्रदायक (अपरेटर) कम्पनीले अनुमति लिएका छन् । प्राधिकरणले १० हजार फिटमाथि उडान गर्ने वायुसेवा कम्पनीले नेपाली आकाशमा इन्टरनेट तथा मोबाइल सञ्चालनको अनुमति दिएसँगै सीता र थालिस कम्पनीले अनुमति लिएका हुन् ।