पूजास्थल बाहिर गोली चल्दा ७ जनाको मृत्यु, तीन घाइते
प्रकाशित मिति : माघ १३, २०७९ शुक्रबार
पूर्वी जेरुसेलमको एक सिनेगोग (यहूदीहरूको पूजास्थल) मा गोली चल्दा सात जनाको मृत्यु भएको छ । पछिल्ला केही वर्षयताको यो सबैभन्दा ठूलो घटना हो ।
घटनामा तीन जना घाइते भएका छन्। घटना स्थानीय समय अनुसार बेलुका ८:१५ बजे सहरको नेभ याकोभ क्षेत्रमा भएको हो। स्थानीय सञ्चारमाध्यमले आक्रमणकारी पूर्वी जेरुसेलमका प्यालेस्टाइनी भएको बताएका छन् ।
इजरायली पुलिस कमिश्नर कोबी शाबताईले घटनास्थलमा पुगेर भनेका छन्, ‘पछिल्लो समयमा भएको सबैभन्दा दुःखत आक्रमण मध्ये एक हो ।’ इजरायलका यहूदीहरू यहूदी शब्बाथको अवसरमा पूर्वी जेरुसेलमको यहूदी बस्तीमा रहेको एउटा सभाघरमा प्रार्थना गर्न भेला भएको बताइएको छ।
यहुदीहरूले जर्मनीमा नाजी शासनकालमा प्रलयमा मारिएका करिब ६० लाख यहूदी र अन्य पीडितहरूको सम्झनामा ुहोलोकास्ट मेमोरियल डेु मनाउँछन्। मानिसहरू सभाघरमा मारिएकाहरूलाई सम्झन आएका थिए। त्यहाँ जम्मा भएका मानिसहरु बाहिरिने क्रममा आक्रमणकारीले मानिसहरुमाथि गोली प्रहार गरेका थिए ।
घटना लगत्तै इजरायलका प्रधानमन्त्री बेन्जामिन नेतन्याहुले घटनास्थलको भ्रमण गरेका थिए । बेलायत र अमेरिकाले यो आक्रमणको निन्दा गरेका छन् ।
बेलायतका विदेश सचिव जेम्स क्लेभरलीले ट्वीटरमा आक्रमणको निन्दा गर्दै लेखेका छन्, “होलोकास्ट मेमोरियल डे र शब्बातमा सभाघरमा मानिसहरूले आक्रमण गरेको देख्दा डरलाग्दो छ। हामी इजरायलका हाम्रा साथीहरूसँग उभिन्छौं।”