अमेरिकी राजनीतिक मामिला उपमन्त्री भिक्टोरिया नेपाल आउँदै
प्रकाशित मिति : माघ ११, २०७९ बुधबार
अमेरिकी राजनीतिक मामिला उपमन्त्री भिक्टोरिया नुल्यान्ड, जनवरी २९–३० मा दुई दिने नेपाल भ्रमणमा आउँदै छिन् । पुस ११ गते माओवादी केन्द्रका अध्यक्ष पुष्पकमल दाहाल प्रचण्ड नेतृत्वमा नयाँ वामपन्थी सरकार बनेपछि विदेश मुलुक अमेरिकी अधिकारीको पहिलो नेपाल भ्रमण हुन लागेको हो ।
उपमन्त्री नुल्यान्ड बदलिँदो भूराजनीतिक परिवेशमा नेपालको भ्रमण गर्दै यहाँको वस्तुस्थिती बुझ्न र नयाँ सरकारसँग सहकार्य गर्नका लागि आउन लागेको परराष्ट्रका एक अधिकारीले बताए । उनले प्रधानमन्त्री दाहालसहित एमाले अध्यक्ष केपी शर्मा ओली, कांग्रेस सभापति शेरबहादुर देउवा, राष्ट्रिय स्वतन्त्र पार्टीका अध्यक्ष तथा उपप्रधान तथा गृह मन्त्री रवि लामिछाने, राप्रपा अध्यक्ष तथा उपप्रधानमन्त्री राजेन्द्र लिङ्देन, परराष्ट्र मन्त्री विमला राई पौड्याललगायतलाई भेट्ने छिन् । नेपालमा सरकार गठनलगत्तै प्रधानमन्त्रीको दुई छिमेकी मुलुकहरू भारत र चीन भ्रमणको विषयमा बहस भइरहेको बेलामा अमेरिकाबाट भ्रमण हुन लागेको हो ।
परराष्ट्रका एक अधिकारीका अनुसार यो भ्रमणमा मुख्य गरी अमेरिकाको अनुदान सहयोगमा अघि बढेको मिलेनियम च्यालेन्ज कर्पोरेसन सम्झौता (एमसीसी)को सहयोगमा भइरहेको कामको बारेमा छलफल हुनेछ । साथै, उपमन्त्री नुल्यान्डले नेपालमा अमेरिकी अन्तर्राष्ट्रिय विकासका लागि नियोग (यूएसएआईडी) मार्फत भइरहेका र भविष्यमा हुने प्रस्तावको बारेमा पनि छलफल गर्नेछिन् ।
छिमेकी देश भारतका विदेशमन्त्रीको भने नेपालको सद्भावना भ्रमणसंगै प्रधानमन्त्री प्रचण्डलाई समकक्षी नरेन्द्र मोदीको निमन्त्रणा दिने कामका लागि आउन लागेको बुझिएको छ । क्वात्रा विदेश सचिव हुनु अघि नेपालका लागि भारतीय राजदूतका रुपमा करिब ३ वर्ष काठमाडौं बसेका थिए ।