न्युयोर्कको क्वीन्समा हाई स्कूल बाहिर दुई टिनएजरलाई गोली हान्ने १३ बर्षीय पक्राउ, तीन अभियोग
प्रकाशित मिति : माघ ५, २०७९ बिहीबार
एक १३ वर्षीय केटाले क्वीन्स हाई स्कूल नजिकै भएको झडपको क्रममा दुई टिनएजरहरुलाई गोली प्रहार गरेको आरोप लगाइएको प्रहरीले बताएको छ । नाबालिग भएका कारण गोली चलाउने केटाको नाम सार्वजनिक गरिएको छैन ।
गोली चलाउनेविरुद्ध आक्रमण, हतियारको आपराधिक कब्जा र खतरनाक लापरवाहीको अभियोग लगाइएको छ । क्याम्ब्रिया हाइट्समा क्याम्पस म्याग्नेट हाइस्कुल बाहिर भएको गोलीकाण्डमा एक १६ वर्षीया किशोरी र १४ वर्षीय किशोर घाइते भएका छन् ।
बुधबार साँझ ४ बजेर ५० मिनेटमा विद्यालय बाहिर बस स्टपमा भएको झडपमा केटीको गोलीगाँठोमा र केटाको खुट्टामा चोट लागेको प्रहरीले जनाएको छ । पीडितहरू स्कूलका विद्यार्थीहरू रहेको र उनीहरुको खतरामुक्त अवस्थामा अस्पतालमा उपचार भइरहेको जनाइएको छ ।
बन्दुकधारीले भाग्न खोज्दा बन्दुक छाडेको थियो । उक्त हतियार प्रहरीले बरामद गरेको छ । कुनै पनि पीडितलाई लक्षित गरीएको थियो वा थिएन भन्ने प्रष्ट छैन । यद्यपि पुलिसले दुबै जना झगडामा सक्रिय सहभागी नभएको बताएको छ ।
क्याम्पस म्याग्नेटमा रहेका चार माध्यमिक विद्यालयहरू मध्ये एक स्वास्थ्य, कला, प्रविधि र रोबोटिक्स हाई स्कूलका सिनियर १७ वर्षीय एन्थोनी फ्रेजियरले यो घटना दुःखद् भएको तर अनपेक्षित भने नभएको बताएका छन् । आफू अब यस स्कूलमा सुरक्षित भएको महसुस नगर्ने फ्रेजियरले बताए । न्यु योर्क शहरले बच्चाहरूलाई सुरक्षित राख्न पर्याप्त काम नगरेको उनको भनाई छ ।