पोखरामा दुर्घटनामा परेको नेपाली विमानमा दुई अमेरिकी नागरिक, दुई ग्रिनकार्डवाहक
प्रकाशित मिति : माघ ५, २०७९ बिहीबार
गत साताको अन्त्यमा नेपालमा विमान दुर्घटना हुँदा ज्यान गुमाउने ७२ जनामध्ये दुई अमेरिकी नागरिक र दुई जना ग्रिनकार्डवाहक रहेको पुष्टी भएको छ । अमेरिकी विदेश मन्त्रालयले यसको पुष्टी गरेको हो ।
दुर्घटनामा ज्यान गुमाउनेहरुका परिवारप्रति अमेरिकी विदेश मन्त्रालयका प्रवक्ता नेड प्राइसले बुधबार एक ब्रीफिंगमा समवेदना व्यक्त गरेका छन् । यो कठिन घडीमा नेपाललाई जसरी पनि सहयोग गर्न अमेरिका तयार रहेको उनले बताएका छन् ।
उडानमा १५ विदेशी नागरिकहरू भारत, रसिया, दक्षिण कोरिया, अर्जेन्टिना, अष्ट्रेलिया, फ्रान्स र आयरल्याण्डका व्यक्तिहरू रहेको बताइएको थियो । तर अमेरिकनहरु रहेको बताइएको थिएन । उनीहरु नेपाली मूलका अमेरिकनहरु भएका कारण नेपालको सरकारले नेपालीकै रुपमा गणना गरेको थियो ।
अमेरिकी विदेश मन्त्रालयका प्रवक्ता नेड प्राइसले मृत्यु भएका दुई अमेरिकी र दुई जना ग्रिनकार्डवाहकको नाम बताएका छैनन् ।
Deeply saddened by the Yeti Airlines crash in Pokhara. Our thoughts are with the families and loved ones of those on board. The United States stands ready to support Nepal in any way we can.
— Ned Price (@StateDeptSpox) January 17, 2023
अमेरिकाको टेक्सासबाट नेपाल गएकी २१ बर्षकी बन्दना सुनारको दुर्घटनामा ज्यान गएको थियो भने अमेरिकाबाट नेपाल घुम्न गएका हरि परियारको ४ जनाको परिवार दुर्घटनामा परेको थियो । त्यस्तै पोखराको हेम्जा हनुमान चोकका राजन सापकोटाले पनि अमेरिकाबाट घर जाने क्रममा ज्यान गुमाएका थिए ।
यति एयरलाइन्सको उडान नम्बर ६९१ आइतबार बिहान नेपालको राजधानी काठमाडौंबाट उडेको थियो । करिब १२५ माइल पश्चिमको पर्यटकीय सहर पोखरामा २५ मिनेटको यात्रा गर्नु पर्ने थियो । तर, विमान उडेको ३० मिनेटपछि र पोखराको दुई साता पुरानो विमानस्थलबाट करिब एक माइल टाढाको खोंचमा खसेको थियो ।