फाइजरले नेपाल लगायत न्यून आय भएका ४५ देशलाई सबै औषधि विना नाफा बेच्ने
प्रकाशित मिति : माघ ३, २०७९ मंगलबार
Coolcaesar, CC BY-SA 4.0, via Wikimedia Commons
अमेरिकी औषधि निर्माता कम्पनी फाइजरले किमोथेरापी र मुखको क्यान्सरको उपचार लगायतका औषधिहरू नेपाल लगायत ४५ वटा न्यून आय भएका देशहरुलाई विना नाफा सस्तो मूल्यमा उपलब्ध गराउने घोषणा गरेको छ । कम्पनीको आफ्नो कार्यक्रमको विस्तार गर्दै विश्वका केही गरिब देशहरूमा नवीन उपचारहरूमा पहुँच बढाउने उद्देश्यले ५ सय उत्पादनहरू सस्तोमा बेच्ने भएको छ ।
मे २०२२ मा यो कार्यक्रम सुरु गर्दा फाइजरको कोभिड १९ को उपचार प्याक्सलोभिड र यसको ठूलो बिक्री हुने स्तन क्यान्सरको औषधि इब्रान्स लगायत २३ उत्पादनहरु नाफा नकमाउने मूल्यमा बेच्ने घोषणा गरेको थियो । तर अब औषधीहरु थप गरिएको घोषणा गरिएको छ । अब फाइजरले प्रत्येक वर्ष यी देशहरूमा लगभग १ मिलियन नयाँ क्यान्सरको उपचार गर्ने क्षमता रहेको बताएको छ।
स्विट्जरल्याण्डको डाभोसमा भएको विश्व आर्थिक मञ्चको वार्षिक बैठकमा घोषणा गरिएको यो कदमले नेपाल लगायत अफगानिस्तान, हाइटी, उत्तर कोरिया, किर्गिजस्तान, रुवाण्डा, युगान्डालगायत विश्वका गरिब देशहरूमा बसोबास गर्ने करिब १ अर्ब २० करोड मानिसका लागि फर्मका करिब ५०० उत्पादनहरूमा पहुँच विस्तार गर्नेछ। यसमा प्याटेन्ट र अफ प्याटेन्ट औषधिहरू समावेश हुनेछन् ।
यस योजनामा एन्टिबायोटिकको फराकिलो दायरा पनि समावेश छ, जुन फर्मले एन्टिमाइक्रोबियल प्रतिरोधसँग सम्बन्धित लागत र जोखिमहरूलाई सम्बोधन गर्न मद्दत गर्नेछ र अस्पताल तथा सामुदायिक स्वास्थ्य क्लिनिकहरूमा ब्याक्टेरियाको संक्रमणबाट हुने लगभग १५ लाख मृत्युलाई रोक्न मद्दत गर्नेछ। फाइजरले यो योजनामा नयाँ खोप र औषधिहरू थप्ने बताएको छ।