क्यालिफोर्नियामा एक नरसंहारमा १७ बर्षकी आमा र एक बच्चा सहित ६ जनाको गोली हानी हत्या
प्रकाशित मिति : माघ २, २०७९ सोमबार
क्यालिफोर्नियाको एक नरसंहारमा एक बच्चा सहित ६ जनाको हत्या भएको छ । घटना सम्भवतः गिरोहसँग सम्बन्धित भएको प्रहरीले बताएको छ ।
क्यालिफोर्नियाको गोशेन सहरमा सोमबार बिहान भएको घटनामा एउटी आमा र उनको ६ महिनाको बच्चा सहित कम्तीमा छ जनाको हत्या भएको हो ।
स्थानीय समय अनुसार सोमबार बिहान साढे ३ बजे मात्र गोली चलेकोबारे खबर पाएका थिए । धेरैपटक गोली चलेकाले फोन गर्ने व्यक्तिले उक्त क्षेत्रमा सक्रिय शूटर भएको ठानेका थिए ।
प्रहरी घटनास्थलमा पुग्दा छ जनालाई गोली लागेको फेला पारेका थिए । दुईजना सडकमा थिए भने एकजना गोली चलेको घरको ढोकामा थिए । १७ वर्षीया आमा र बच्चा दुवैको टाउकोमा गोली हानिएको थियो । पीडितमध्ये एक जनालाई अस्पताल लगिएको थियो भने पछि अस्पतालले मृत घोषित गरेको थियो ।
घटनास्थलबाट सुरक्षित ल्याइएको परिवारका सदस्यहरु समेत रहेको अनुसन्धानकर्ताहरूले बताएका छन् । तर उनीहरु कसरी बाँचेका थिए भन्नेबारे केही बताइएको छैन । कम्तीमा दुई संदिग्धहरूको खोजि भइरहेको छ ।
आक्रमण योजनावद्ध तरिकाको देखिएको र गिरोह गतिविधिसँग जोडिएको हुन सक्ने प्रहरीले बताएको छ । उक्त घरमा प्रहरीले लागुऔषधका लागि छापा मारेको एकसातापछि यो घटना भएको हो ।