अन्तत १.३५ बिलियनको मेगा मिलियनले पायो विजेता, यी हुन् विजेता नम्बरहरु
प्रकाशित मिति : पुस ३०, २०७९ शनिबार
अन्तत अमेरिकामा १.३५ बिलियनको मेगा मिलियनले विजेता पाएको छ । मेन राज्यले आफ्नो पहिलो मेगा मिलियन्स ज्याकपोट जित्न सफल भएको छ । शुक्रबार १३ लाई धेरैले असुभ मानेपनि मेगा मिलियनका लागि भने शुक्रबार १३ फेरि एक पटक भाग्यशाली भएको हो ।
मेनमा एक एकल विजेताले नयाँ वर्षको धेरै खुसीयाली मनाउनेछन् । शुक्रबार राति खिचेका सबै छ वटा नम्बरहरूमध्ये ३०, ४३, ४५, ४६ र ६१ साथै मेगा बल १४ पारेका उनले अनुमानित पुरस्कार १.३५ बिलियन मध्ये एकमुष्ठ नगद लिन चाहेको खण्डमा ७२४ मिलियन प्राप्त गर्नेछन् । जुन खेलको इतिहासमा दोस्रो ठूलो ज्याकपोट हो । जसमध्ये ठूलो रकम ट्याक्समा समेत तिर्नुपर्नेछ ।
त्यस्तै न्युयोर्कका ४ जना, क्यालिफोर्नियाका २ जना, फ्लोरिडा, इलिनोय, कन्सास, केन्टकी, मोन्टाना, नर्थ क्यारोलिना, पेन्सिभेनिया र टेक्सासका एकएकजना गरी १४ जनाले एकएक मिलियन जितेका छन् ।
१६४ जनाले दशदश हजार डलर जितेका छन् भने ३ हजार ९ सय ७० जनाले पाँचपाँचसय जितेका छन् । ११ हजार १ सय ९८ जनाले दुईदुईसय जितेका छन् भने २ लाख ६७ हजार ७ सय ५३ जनाले सुरुका तीनवटा नम्बर मिलाएर दशदश डलर जितेका छन् । त्यस्तै सुरुका दुईवटा र मेगाबल मिलाएर दशदश डलर जित्नेहरु २ लाख ३६ हजार २ सय २९ जना रहेका छन् ।
त्यस्तै १८ लाख ७१ हजार ६ सय ५४ जनाले चारचार डलर र ४६ लाख ८१ हजार ८ सय ४९ जनाले दुईदुई डलर जितेका छन् । यसरी कुल ७० लाख ७२ हजार ५ सय ३२ जनाले २ डलरदेखिमाथि कुनै न कुनै रकम जितेका छन् ।
अब शुक्रबार १३ तारिखमा यो सहित खेलाडीहरुले ७ वटा ज्याकपटहरू जितेका छन्। यस अगाडि जुन २००८, मे २०११, जुन २०१४ र अक्टोबर २०१७ मा १३ तारिख शुक्रबार नै मिशिगनका विजेताले ज्याकपट जितेका थिए । २०१७ को ज्याकपट रोड आइल्याण्डमा एक विजेतासँग साझेदारी गरिएको थियो।
१३ तारिख शुक्रबारका अन्य ज्याकपटहरू न्यूयोर्कका विजेताले मार्च २००९ मा र ओहायोका विजेताले नोभेम्बर २०१५ मा जितेका थिए । तथापि, तिनीहरूमध्ये कुनै पनि यस हप्ताको अन्त्यमा खोलिने अनुमानित १ दशमलव ३५ बिलियनको आकारमा थिएनन् । शुक्रबारको अनुमानित पुरस्कार भन्दा ठूलो मेगा मिलियन्स ज्याकपोट १ दशमलव ५ बिलियनको गेम रेकर्ड हो, जुन अक्टोबर २३, २०१८ मा दक्षिण क्यारोलिनामा जितिएको थियो।
मेगा मिलियन चिठ्ठा अमेरिकाका ४४ वटा राज्यहरुमा खेल्न सकिन्छ । साथै वासिंटन डिसी र युएस भर्जिन आइल्याण्डमा पनि खेल्न सकिन्छ ।
मेगा मिलियन हरेक मंगलबार र शुक्रबार न्युयोर्क समय अनुशार राती ११ बजे खोलिन्छ । यसको ज्याकपटक जित्नका लागि ३०२ मिलियन टिकटबीच सबैभन्दा धेरै भाग्यशाली हुन जरुरी छ । यो टिकटको मूल्य २ डलर रहेको छ । खेल्ने व्यक्तिले १ देखि ७० भित्रका ५ वटा नम्बर र १ देखि २५ भित्रको एउटा नम्बर छनौट गर्नुपर्छ ।
लोटरीबाट राज्यले कमाएको शतप्रतिशत नाफा रकम शिक्षामा
न्युयोर्क लोटरी उत्तर अमेरिकाको सबैभन्दा ठूलो र सबैभन्दा फाइदा गर्ने लोटरी बन्ने क्रम जारी रहेको छ । यो राज्यबाट संचालित सरकारी लोटरी हो । तपाईलाई लाग्न सक्छ यसरी लोटरीबाट कमाएको नाफा रकम कहाँ जान्छ ?
वास्तवमा लोटरीबाट गरेको नाफा रकम शिक्षामा जाने गरेको छ । आर्थिक बर्ष २०२१/२०२२ मा न्युयोर्क राज्यमा शिक्षामा सहायताका लागि न्युयोर्क लोटरीले ३ दशमलव ६ बिलियन डलर प्रदान गरेको थियो । न्युयोर्क लोटरीको आम्दानी स्थानीय विद्यालय डिस्ट्रिक्टहरुमा वितरण गरिन्छ ।
राज्यबाट प्रदान गरिने अन्य सहायताका लागि जुन शुत्र प्रयोग गरिन्छ, लोटरीको आम्दानी रकम पनि त्यही शुत्र प्रयोग गरेर शिक्षामा प्रदान गरिदै आएको छ । कुन स्कुल डिस्ट्रिक्टमा कति रकम जाने भन्ने कुरा डिस्ट्रिक्टको आकार र आयस्तर दुवैलाई ध्यान दिएर निर्धारण गरिन्छ । ठूला, कम आय भएका स्कुल डिस्ट्रिक्टहरुले धेरै सहायता रकम प्राप्त गर्छन्।
लोटरीबाट भएको शतप्रतिशत आम्दानीको रकम शिक्षामा खर्च गरिन्छ । सन् १९६६ मा न्युयोर्कमा ६६ प्रतिशत मतदाताहरुले न्युयोर्कको लोटरीको आम्दानीको रकम सबै शिक्षामा प्रदान गर्नुपर्ने नियम स्वीकृत गरेका थिए ।
आर्थिक बर्ष २०२०/२०२१ मा न्युयोर्कमा ८ दशमलव ५९ बिलियनको लोटरी बिक्री भएको थियो । त्यसमध्ये २ दशमलव ५ बिलियन डलर आम्दानी शिक्षामा खर्च गरिएको थियो भने ४ बिलियन डलरभन्दा धेरै रकम विजेताहरुले पाएका थिए । बाँकी रकम बिक्रेतालाई कमिशन, ठेकेदारलाई शुल्क र अन्य खर्चमा समेत जाने गर्छ ।
अहिलेसम्मको इतिहासमा सबैभन्दा धेरै न्युयोर्कमा १० दशमलव २९ बिलियनको लोटरी आर्थिक बर्ष २०१८- २०१९ मा बिक्रि भएको थियो । जसमध्ये ३ दशमलव ४ बिलियन विद्यालयहरुलाई सहायतामा खर्च गरिएको थियो भने बाँकी रकम विजेता, बिक्रेता, ठेकेदार र अन्य खर्चमा लागेको थियो ।
न्युयोर्कमा मेगा मिलियन, पावरबल, क्यास फर लाइफ र न्युयोर्क लोट्टोगरी ४ वटा ज्याकपट खेलाइन्छ । जसमा सबैभन्दा धेरै मेगा मिलियन बिक्रि हुने गरेको छ । त्यो बाहेक न्युयोर्कमा स्क्रयाच गर्ने र दैनिक खेलिने अन्य लोटरीहरु पनि छन् ।