अन्तर्राष्ट्रिय दबाबपछि तालिबानले महिलामाथिको प्रतिबन्ध फुकुवा गर्ने संकेत
प्रकाशित मिति : पुस २६, २०७९ मंगलबार
महिलामाथिको प्रतिबन्धलाई लिएर अन्तर्राष्ट्रिय समुदायको विरोधको सामना गरिरहेको तालिबानले केही नरम हुने संकेत देखाएको छ ।
अफगानिस्तानमा काम गर्ने एउटा महत्त्वपूर्ण अन्तर्राष्ट्रिय सहायता एजेन्सीले कम्तीमा तीन तालिबान मन्त्रीहरूले महिलामाथिको प्रतिबन्ध हटाउन शीर्ष नेतृत्वले काम गरिरहेको जानकारी दिएको छ ।
काबुल भ्रमणमा रहेका नर्वेको शरणार्थी परिषद्का प्रमुख जान इगल्यान्डले तालिबानले महिलाको काम र बालिका शिक्षामा लगाइएको प्रतिबन्ध हटाउन नसके अफगानिस्तानलाई अन्तर्राष्ट्रिय सहायता रोक्न सुरु हुने बताएका थिए ।
तालिबान नेताहरूले उनीहरू अर्को तरिकाले काम गरिरहेको आफूलाई जानकारी दिएको उनले बताए । यो तरिका अनुसार महिलाहरूलाई पढ्न अनुमति दिइनेछ। सबैभन्दा महत्त्वपूर्ण कुरा महिलाहरू काममा फर्कन सक्नेछन्।
नर्वेको शरणार्थी परिषद्का प्रमुख जानले भने – ‘उनीहरूले आफ्नो वाचा पूरा गर्नुपर्छ । हामीलाई वाचा गरिएको थियो कि हामी महिलाहरूसँग काम गर्न सक्षम हुनेछौं । उनीहरूलाई शिक्षा दिइनेछ।’