ट्विटरले पत्रकारको खाता निलम्बन गरेपनि संयुक्त राष्ट्र र ईयूको विरोध, ट्विटरमा प्रतिबन्ध लगाउने चेतावनी
प्रकाशित मिति : पुस १, २०७९ शुक्रबार
युरोपियन युनियनपछि अब संयुक्त राष्ट्र संघले पनि ट्वीटरमा केही पत्रकारको खाता निलम्बन गर्ने निर्णयको विरोध गरेको छ । ट्विटरले न्युयोर्क टाइम्स, सीएनएन र वासिङ्टन पोस्टका पत्रकारको खाता बन्द गरेको छ ।
संयुक्त राष्ट्र संघले मिडिया स्वतन्त्रता ‘कुनै खेलौना’ नभएको ट्वीट गरेको छ जबकि युरोपेली संघले ट्विटरमा प्रतिबन्ध लगाउने चेतावनी दिएको थियो।
ट्वीटरका एक प्रवक्ताले अमेरिकी प्राविधिक समाचार वेबसाइटलाई भने – ‘पत्रकारहरूको ट्विटर खाताहरू लोकेशन डाटाको लाइभ साझेदारीको लागि निलम्बन गरिएको छ।’
संयुक्त राष्ट्र संघका ग्लोबल कम्युनिकेसन्सका उप-महासचिव मेलिसा फ्लेमिङले ट्वीटरबाट पत्रकारहरूलाई “मनमाना” निलम्बन गरिएको खबरले आफू “गहिरो चिन्तित” भएको बताइन्।
उनले भनिन् , ‘मिडिया स्वतन्त्रता खेलौना होइन । स्वतन्त्र प्रेस लोकतान्त्रिक समाजको आधारशिला हो र हानिकारक विकृति विरुद्धको लडाईमा महत्त्वपूर्ण भूमिका खेल्छ।”
यसअघि शुक्रबार युरोपेली युनियन कमिसनरले ट्विटरलाई युरोपको नयाँ डिजिटल सेवा ऐन अन्तर्गत प्रतिबन्ध लगाउने चेतावनी दिएका थिए।
उनले यस ऐनअन्तर्गत ‘मिडियाको स्वतन्त्रता र आधारभूत अधिकारको सम्मान आवश्यक रहेको बताए । एलोन मस्कलाई यसको बारेमा थाहा हुनुपर्छ।
एलोन मस्कले यस विषयमा सीधै बोलेनन् तर ट्विटमा भनेका छन्, “दिनभर मेरो आलोचना गर्नु एकदमै राम्रो हो तर मेरो वास्तविक स्थानको बारेमा बताउन र मेरो परिवारलाई खतरामा पार्नु ठीक होइन।”