इरानमा २३ बर्षका प्रदर्शनकारीलाई सार्वजनिकस्थलमा झुण्डाएर मृत्युदण्ड
प्रकाशित मिति : मंसिर २६, २०७९ सोमबार
इरानले एक व्यक्तिलाई सार्वजनिकस्थलमा झुण्डाएर मृत्युदण्ड दिएको सोमबार घोषणा गरेको छ । सेप्टेम्बरमा पहिलो पटक भड्किएको सरकार विरोधी प्रदर्शनहरू विरुद्ध सरकारले कारवाही सुरुगरेदेखि प्रदर्शनकारीलाई दिइएको यो दोस्रो मृत्युदण्ड हो।
उत्तरपूर्वी इरानको मशाद सहरमा सार्वजनिक रूपमा मानिसहरूको एक समूहको उपस्थितिमा माजिद्रेजा रहनावर्डलाई फाँसी दिइएको थियो।उनको टाउको छोपिएको थियो भने रातीको समयमा क्रेनमा जोडिएको डोरीमा झुण्डाएर मारिएको थियो ।
रहनावार्डलाई इस्लामिक रिभोलुसनरी गार्ड्स कोर्प्सको एउटा सादा पोशाकको स्वयंसेवी बल बसिज मिलिशियाका दुई सदस्यलाई छुरा प्रहार गरी हत्या गरेको र गत महिना उत्तरपूर्वी इरानी सहर मशदमा अन्य चार जनालाई घाइते बनाएको आरोप लागेको थियो । एक अदालतले रहनावार्डलाई भगवान विरुद्ध युद्ध छेडेकोमा दोषी ठहराएको थियो ।
रहनावर्ड २३ वर्षका थिए र उनी पक्राउ हुनुअघि मशदको फलफूल पसलमा काम गरिरहेका थिए।
इरानका अन्य सहरहरू जस्तै मशहदमा पनि विगत तीन महिनादेखि इस्लामिक गणतन्त्रको अन्त्यको लागि आह्वान गर्दै उग्र प्रदर्शन भइरहेको छ । सेप्टेम्बरमा बुर्का कानूनको उल्लंघन गरेको आरोपमा पक्राउ परेपछि एक युवती महसा अमिनीको नैतिकता प्रहरीको हिरासतमा मृत्यु भएपछि विरोध सुरु भएको थियो।
मृत्युदण्डलाई प्रदर्शनमा सरकारको प्रतिक्रियाको तीव्रता र शासनको अन्त्यको लागि आह्वान गरिरहेका प्रदर्शनकारीहरूलाई डर देखाउने प्रयासको रूपमा हेरिएको छ ।
इरान मानव अधिकारका अनुसार जारी राष्ट्रव्यापी विरोध प्रदर्शनमा ६३ बालबालिका सहित कम्तीमा ४५८ व्यक्तिको मृत्यु भएको छ र हजारौंलाई पक्राउ गरिएको छ।