हेडसेट नकिन्दिएको भन्दै अमेरिकामा १० वर्षीय बालकबाट आमाको गोली हानी हत्या
प्रकाशित मिति : मंसिर १६, २०७९ शुक्रबार
एक १० वर्षीय बालकलाई आफ्नी आमालाई गोली हानेर हत्या गरेको आरोपमा वयस्कको रूपमा अभियोग लगाइएको प्रहरीले जानकारी दिएको छ । हेडसेट नकिन्दिएको भन्दै अमेरिकाको विसकन्सिन मिलाउकीमा उक्त बालकले आमाको हत्या गरेको र आमाको अमेजन एकाउन्टमा गएर हेडसेट अर्डर गरेको अधिकारीहरूले बताएका छन् ।
बालकलाई पहिलो डिग्री लापरवाह हत्याको आरोप लगाइएको छ र मिलवाउकीको बाल हिरासत केन्द्रमा राखिएको छ । उमेरका कारण बालकको नाम सार्वजनिक गरिएको छैन । बालकले घरको बेसमेन्टमा आमाको टाउकोमा गोली हानेको जनाइएको छ ।
बालकले सुरुमा अनुसन्धानकर्ताहरुलाई आफू आमाको बन्दुकसँग खेलिरहेका बेला दुर्घटनावश गोली चलेको बताएको प्रहरीको भनाई छ । तर अर्को दिन आफैले हत्या गरेको स्वीकार गरेको जनाइएको छ । हजुरआमा रोइरहेको देखेपछि बालकले आफ्नाी आमालाई मारेकोमा माफी मागेको जनाइएको छ ।
बालकले आफ्नी आमाको हत्याको लागि माफी मागेपछि अमेजनबाट भीआर हेडसेटको प्याकेज आए नआएको सोधेको समाचारहरुमा उल्लेख छ । बच्चाको फर्निचरमा आगो लगाउने र परिवारको कुकुरलाई पुच्छर समातेर झुण्डाउने लगायत हिंसात्मक व्यवहारको इतिहास रहेको आफन्तहरूले प्रहरीलाई बताएका छन् ।
अनलाइन रेकर्ड अनुसार बच्चाको अर्को अदालतको सुनुवाइ बुधबारको लागि तय गरिएको छ।