भारतीय प्रहरीले भण्डारण गरेको ५ सय किलो गाँजा मुसाले खाएको आरोप
प्रकाशित मिति : मंसिर ९, २०७९ शुक्रबार
उत्तरी भारतमा लागुऔषध व्यापारीहरूबाट बरामद गरिएको सयौं किलोग्राम गाँजा प्रहरीको गोदाममा राखेको बेलामा मुसाले खाएको आरोप लगाइएको छ।
मुसाहरू साना जनावर रहेको र तिनीहरू प्रहरीसँग नडराउने उत्तर प्रदेशको मथुरा सहरको एक अदालतले उल्लेख गरेको छ । स्थानीय पुलिसले लगभग २ सय किलोग्राम बरामद गाँजा भर्खरैको घटनामा प्रमाणको रूपमा पेश गर्न नसकेपछि भएको सुनुवाईमा अदालतले यस्तो उल्लेख गरेको हो ।
अदालतका कागजातहरूमा पुलिसलाई ३८६ किलोग्राम गाँजा उपलब्ध गराउन भनिएको थियो, तर अभियोजन पक्षले मथुराका विभिन्न स्टेशनहरूमा भण्डारण गरिएको ७ सय किलोग्राम भन्दा बढी गाँजा मुसाको प्रकोपबाट प्रभावित हुनसक्ने अदालतलाई जवाफ दिए।
मुसालाई आरोप लगाइएको घटना पहिलो भने होइन। मुद्दाको सुनुवाइ गर्दै न्यायाधीशले विभिन्न घटनामा बरामद गरी सहरको शेरगढ र राजमार्ग प्रहरी चौकीमा राखिएको ५ सय किलोभन्दा बढी गाँजाका सन्दर्भमा पनि मुसालाई दोष दिइएको उद्धृत गरेका थिए ।
लगभग सबै प्रहरी चौकीहरूमा मुसाको त्रास रहेकाले जफत गरिएको गाँजाको सुरक्षा गर्न आवश्यक प्रबन्ध गर्न आवश्यक रहेको अदालतको कागजातमा उल्लेख छ । यद्यपि मुसाले गाँजा खाएको घटनाहरू विश्वास गर्न भने गाह्रो हुने कतिपयको भनाई छ ।
अदालतको मुद्दा पछि बोल्दै मथुरा शहरका पुलिस अधीक्षक मार्तण्ड प्रकाश सिंहले गाँजा मुसाका कारण नभई वर्षा र बाढीले नष्ट भएको बताए । अदालतमा बुझाइएको प्रतिवेदनमा मुसाको कुनै उल्लेख नभएको तथा प्रहरीले बरामद गाँजा वर्षा र बाढीमा नष्ट भएको मात्र उल्लेख गरेको उनले बताएका छन् ।