एलन मस्कले किने ट्वीटर, प्रमुख कार्यकारी अग्रवालसहित ४ शीर्ष कार्यकारी बर्खास्त
प्रकाशित मिति : कार्तिक १०, २०७९ बिहीबार
एलन मस्कले ट्वीटर किनेपछि पहिलो दिन बिहीबार कम्तिमा चार शीर्ष कार्यकारीहरुलाई बर्खास्त गर्दै ट्विटरको सफाइ सुरु गरेका छन् । मस्कले ४४ बिलियन डलरमा ट्वीटर किनेका हुन् ।
बर्खास्त गरिएका ट्विटरका कार्यकारीहरूमा ट्विटरका प्रमुख कार्यकारी पराग अग्रवाल, प्रमुख वित्तीय अधिकृत नेड सेगल, शीर्ष कानुनी तथा नीति कार्यकारी विजया गड्डे र जनरल काउन्सिल सेन एजेट रहेका छन् । बर्खास्त गरिएका कम्तिमा एक कार्यकारीलाई ट्विटरको कार्यालयबाट बाहिर लगिएको थियो ।
५१ वर्षीय अर्बपति मस्कले ट्विटर सेवाको सामग्री मध्यस्थता नियमहरू खुकुलो पार्दै यसको एल्गोरिथ्मलाई थप पारदर्शी बनाउनने तथा व्यवसायहरूलाई प्रोत्साहन गर्ने बताउँदै कर्मचारीहरूलाई निकालेर परिवर्तन गर्ने वाचा गरेका थिए । ट्वीटरबाट शीर्ष कार्यकारीलाई बर्खास्त गरिएकोबारे बर्खास्त हुनेहरु र मस्क आफैले केही बताएका छैनन् ।
गत वर्ष ट्वीटरको प्रमुख कार्यकारीमा नियुक्त भएका अग्रवालले हालैका महिनाहरूमा टेकओभरलाई लिएर सार्वजनिक र निजी रूपमा मस्कसँग विवाद गरेका थिए। मस्कले गाड्डेलाई कम्पनीमा सामग्री मध्यस्थता निर्णयहरूमा उनको भूमिकाको आलोचना गर्दै बर्खास्त गर्ने संकेत गरेका थिए ।