शंकास्पद ९११ फोनकलपछि अमेरिकाको कनेक्टिकटमा मारिए २ प्रहरी अधिकारी
प्रकाशित मिति : आश्विन २७, २०७९ बिहीबार
बुधबार राति अबेर ९११ मा फोनकल आयो, जसमा कनेक्टिकटको ब्रिस्टलमा एउटा घरमा सम्भावित घरेलु झगडाको अनुसन्धान गर्न आवश्यक भएको बताइएको थियो ।
जब तीनजना प्रहरी अधिकारीहरू आइपुगे, त्यहाँ उनीहरुको बन्दुकधारीसँग जम्काभेट भयो । गोली चल्दा ३५ वर्षीय सर्जेन्ट डस्टिन डेमोन्टे र ३४ वर्षीय प्रहरी अधिकारी एलेक्स ह्याम्जी मारिए ।
बन्दुकधारी ३५ वर्षीय निकोलस ब्रुचरलाई पनि घटनास्थलमा गोली हानी मारिएको प्रहरीले जनाएको छ । अर्का प्रहरी अधिकारी एलेक इउराटो बन्दुकको गोली लागेर घाइते भएका छन् । घटनामा बन्दुकधारीका भाई ३२ बर्षीय नाथन ब्रुचर पनि घाइते भएको जनाइएको छ ।
बिहीबार कनेक्टिकटमा झण्डाहरू आधा झुकाइएको थियो । प्रहरीले आफ्ना मारिएका सहकर्मीहरूप्रति शोक र श्रद्धाञ्जली व्यक्त गरे । प्रहरीमाथि किन गोली चलाइयो भन्नेबारे अनुसन्धान भइरहेको छ ।
९११ मा आएको फोनकल प्रहरीलाई फसाउने चालमात्र भएको प्रहरीले आशंका गरेको छ । ब्रिस्टलको रेडस्टोन हिल रोडमा रहेको घरमा अफिसरहरूलाई जानीजानी फसाउन फोनकल गरिएको प्रारम्भिक अनुसन्धानले देखाएको छ । फोनकल राती साढे १० बजे आएको थियो ।
जब प्रहरीहरु त्यहाँ पुगे, निकोलस ब्रुचर पहिले नै घर बाहिर उभिएको थियो । त्यसपछि उसले प्रहरीमाथि गोली चलायो । प्रहरी अधिकारी हम्जीको घटनास्थलमा नै गोली लागेर मृत्यु भयो भने सर्जेन्ट डेमोन्टेलाई अस्पताल लगिएको थियो । र त्यहाँ मृत घोषित गरियो।
सन् २०१८ मा नियुक्त प्रहरी अधिकार इउराटोलाई हार्टफोर्डको सेन्ट फ्रान्सिस अस्पतालमा शल्यक्रियाको लागि लगिएको थियो । उनलाई बिहीबार बिहान ११ बजेपछि अस्पतालबाट डिस्चार्ज गरिएको थियो ।