आयरल्याण्डको ग्यास स्टेशनमा भएको विस्फोटमा मृत्यु हुनेको संख्या ९
प्रकाशित मिति : आश्विन २२, २०७९ शनिबार
उत्तरपश्चिमी आयरल्याण्डको एउटा सानो गाउँलाई चकनाचूर गर्नेगरी ग्यास स्टेशन विस्फोटबाट मृत्यु हुनेको संख्या शनिबार बढेर नौ पुगेको छ । आपतकालीन कामदारहरूले अझै पनि बेपत्ता भएका मानिसहरूलाई भग्नावशेषको थुप्रोमा खोजिरहेका छन् ।
काउन्टी डोनेगलको क्रिसलोफमा शुक्रबारको विस्फोटबाट थप बाँचेकाहरू फेला पार्ने आशा गरिएको छैन । करिब ४०० व्यक्तिको समुदायमा रहेको एप्पलग्रीन सर्भिस स्टेशन ध्वस्त भएपछि आठ जनालाई अस्पतालमा भर्ना गरिएको थियो ।
विष्फोटले गाउँको मुख्य पसल र हुलाक कार्यालय रहेको ग्यास स्टेशन भवनका साथै छेउछाउको अपार्टमेन्ट भवनमा क्षति पुगेको छ भने नजिकैको कटेजका झ्यालहरू फुटेका छन् । घटनास्थलबाट सय यार्ड टाढासम्म ब्लकहरू उछिट्टिएका थिए ।
आयरल्याण्डका प्रधानमन्त्री माइकल मार्टिनले डोनेगल र सम्पूर्ण देशका लागि सबैभन्दा कालो दिन भएको बताएका छन् । आयरल्यान्डको संसदमा डोनेगलको प्रतिनिधित्व गर्ने कृषि मन्त्री चार्ली म्याककोनालोगले यो क्षेत्रको मुख्य बाटोमा रहेको स्थान प्रसिद्ध रहेको र स्थानीय समुदायको हृदय रहेको बताएका छन् ।
शनिबार बिहान स्थानीय चर्चमा आयोजित एक कार्यक्रममा फादर जोन जो डफीले आफ्नो समुदाय ’शोकको सुनामी’को चपेटामा परेको बताएका थिए।
बेलायतद्वारा सञ्चालित उत्तरी आयरल्याण्डसँगको सीमाको दुवैतिरबाट फायर सर्भिससहित आपतकालीन सेवाका धेरै गाडीहरू रातभर घटनास्थलमा नै रहेका थिए । गार्ड र नागरिक सुरक्षा पनि संलग्न थिए र कोस्टगार्डको हेलिकप्टरले केही घाइतेहरूलाई लेटरकेनी युनिभर्सिटी अस्पतालबाट राजधानी डबलिनमा लगेको थियो ।
घटनास्थलबाट करिब १५० मिटर (५०० फिट) को दूरीमा रहेको घरका बासिन्दा किरन गालाघेरले घटनामा शक्तिशाली वम विस्फोट प्रयोग गरिएको हुनसक्ने बताए : ‘म त्यतिबेला आफ्नो घरमा थिएँ र विस्फोटको ठूलो आवाज सुनेको थिएँ । तुरुन्तै मैले बाहिर हेर्दा शक्तिशाली बम पड्केको जस्तो थियो ।’