विश्वभर गरिबका लागि घर बनाउन सकृय पूर्व अमेरिकी राष्ट्रपति कार्टरको ९८ औं जन्मदिन
प्रकाशित मिति : आश्विन १५, २०७९ शनिबार
सबैभन्दा बढी उमेरका जीवित अमेरिकी पूर्व राष्ट्रपति जिम्मी कार्टर शनिबार ९८ औं जन्मदिन मनाएका छन् । कार्टर सेन्टरका प्रवक्ताका अनुसार कार्टरले आफ्नो परिवारसँग घरमै चुपचाप जन्मदिन मनाएका छन् ।
कार्टर सेन्टरले पूर्व राष्ट्रपतिको जन्मदिन र विरासत मनाउन श्रृंखलावद्ध भर्चुअल कार्यक्रम गरिरहेको छ । र जनतालाई उनको गैरनाफामुखी संस्था मार्फत भर्चुअल जन्मदिन सन्देश पठाउन प्रोत्साहन गरेको छ ।
२०१८ को अन्तमा ९४ वर्षको उमेरमा जर्ज एच डब्ल्यू बुशको निधन पछि कार्टर इतिहासमा जीवित रहेका सबैभन्दा वृद्ध अमेरिकी पूर्व राष्ट्रपति बनेका छन् । हालका वर्षहरूमा कोरोनाभाइरस महामारीको कारण कममात्र सार्वजनिक रुपमा देखा परेका छन् । तर विश्वभर जोखिममा रहेको लोकतन्त्रको बारेमा भने कुरा गर्न भने जारी राखेका छन्।
पूर्व राष्ट्रपति कार्टर कलेजो र मस्तिष्कको क्यान्सरबाट पीडित थिए । उनको क्यान्सर सन् २०१५ मा निको भएको थियो । कार्टर सन् १९७७ देखि १९८१ सम्म अमेरिकाको राष्ट्रपति भएका थिए ।
राष्ट्रपतिको कार्यकालपछि कार्टर दम्पत्ति निरन्तर सामाजिक काममा सकृय रहदै छन् । कार्टर र उनकी पत्नी रोजलिन अमेरिका, एशिया तथा अफ्रिकाको विभिन्न स्थानमा पुगेर गरिबका लागि घर बनाउनमा सकृय रहे ।
राष्ट्रपति हुनुभन्दा अगाडि उनले जर्जियाबाट सिनेटरका रुपमा प्रतिनिधित्व गरेका थिए । उनी जर्जियाका गभर्नर समेत रहेका थिए । सन् २००२ मा उनी नोबल शान्ति पुरस्कारबाट सम्मानित भएका थिए । कार्टर सेन्टरमार्फत उनले गरेको सामाजिक कार्यबाट उनी निकै प्रशंसित छन् ।