पाकिस्तानी सेनाको हेलिकप्टर दुर्घटना, ६ सैनिकको मृत्यु , हेलिकोप्टर विद्रोहीले खसालेको दाबी
प्रकाशित मिति : आश्विन १०, २०७९ सोमबार
बलुचिस्तानमा भएको हेलिकोप्टर दुर्घटनामा पाकिस्तानी सेनाका दुई मेजरसहित ६ सैनिकको मृत्यु भएको छ । यो घटना हर्नाई जिल्लाको खोस्ट सहर नजिकै उडान मिसनको क्रममा भएको त्यहाँका अधिकारीहरुले जनाएका छन् ।
बलुचिस्तान पोस्ट (टीबीपी) ले यो हेलिकप्टर दुर्घटनामा बलुच विद्रोहीको हात रहेको दाबी गरेको छ । बलुचिस्तान पोस्टले दाबी गर्दै भनेको छ, बलुच विद्रोहीहरूले सेनाको हेलिकप्टरलाई गोली हानेर ६ जना सैनिक मारिदिएको हो । मारिनेमा दुई जना पाइलट पनि रहेका छन् ।
टिबिपिले ट्वीट गर्दै भनेको छ, ’हरनाइको जराद आलो नजिकै सैन्य कारबाहीमा संलग्न पाकिस्तानी गनशिप हेलिकप्टरलाई बलुच विद्रोहीहरूले गोली हानेको छ । जसमा दुई मेजर रैंकका अधिकृतसहित ६ सैनिकको मृत्यु भएको छ ।
हेलिकप्टर दुर्घटनामा मारिएका कमाण्डर जनरल सरफराज अली पाकिस्तानको गुप्तचर एजेन्सी आईएसआईसँग नजिक थिए । बलुचिस्तान समाचार वेबसाइट द बलुचिस्तान पोस्टले प्रश्न उठाउँदै पाकिस्तानी सेनाले खराब मौसमका कारण सैन्य हेलिकप्टर दुर्घटना भएको दाबी गरिरहेको बताएको छ ।