क्यालिफोर्नियामा नेपालीमाथि कुटपिट र लुटपाटपछि गोफण्डमीमा ३४ हजार डलर संकलन
प्रकाशित मिति : जेष्ठ २५, २०७९ बुधबार
अमेरिकाको क्यालिफोर्नियामा नेपालीमाथि भएको आक्रमण र लुटपाटपछि स्थापित गोफण्डमी एकाउन्टमा ३४ हजार डलर संकलन भएको छ । २५ बर्षिय सागर तामाङमाथि कुटपिट र लुटपाट भएको हो ।
गतसाता ओकल्याण्डको फक्स थियटर अगाडि उनीमाथि आक्रमण भएको हो । राति ११ बजेतिर काम सकेपछि स्याण्डवीच किन्न जाने क्रममा उनीमाथि आक्रमण भएको जनाइएको छ ।
उनीमाथि पछाडिबाट आक्रमण गरिएको थियो भने उनको ओभरकोट, पाइन्ट, जुत्ता, वालेट र फोन समेत लुटेर उनलाई टिसर्ट, अण्डरवेयर र मोजामा मात्र छाडिएको थियो । उनलाई आपतकालिन स्वास्थ्य टोलीले अस्पताल लगेको थियो भने त्यहाँ उनको घाउचोटको उपचार गरिएको थियो ।
आक्रमणबाट उनको अनुहार सुन्निएको थियो । उनी बेहोस भएका थिए । अस्पतालमा उपचारपछि भोलिपल्टमात्र उनको होस खुलेको जनाइएको छ । एसियन मुलको भएका कारण घृणा अपराध स्वरुप उनमाथि आक्रमण भएको अनुमान गरिएपनि प्रहरीले यसबारे थप अनुसन्धान गरिरहेको जनाएको छ ।
यदि तपाई गोफण्डमीमार्फत तामाङलाई सहयोग गर्न चाहनुहुन्छ भने यहाँ क्लीक गर्नुहोला ।