न्युयोर्कको एच एण्ड एम स्टोरमा कपडामा जुम्रा भेटिएपछि स्टोर बन्द
प्रकाशित मिति : पुस १६, २०७८ शुक्रबार
न्युयोर्कको वल्र्ड ट्रेड सेन्टर ओकुलसमा रहेको एच एण्ड एमको स्टोरमा बेच्न राखिएका कपडामा जुम्रा भेटिएपछि स्टोर बन्द गरिएको छ । हुडीमा दर्जनौं जुम्राहरु बाहिरै हिडेको देखिएपछि अनुसन्धानका लागि भन्दै स्टोर बन्द गरिएको जनाइएको छ ।
एच एण्ड एमकै उक्त स्टोरमा काम गर्ने एकजना कर्मचारीले ट्वीटरमा जुम्रासहितको हुडीको तस्वीर पोष्ट गरेका थिए । एकजना ग्राहकले जुम्रा हिडिरहेको हुडी भेटाएको र आफूलाई खबर गरेको उनको भनाई छ । तस्वीरमा सेतो रंगका हुडीमा जुम्राहरु हिडेको देख्न सकिन्छ ।
जुम्रा भेटिएपनि सुरुमा स्टोर बन्द गरिएको थिएन भने यसबारे कामदारहरुलाई पनि जानकारी दिइएको थिएन । तर पछि भने स्टोर बन्द गरिएको एच एण्ड एमले जनाएको छ ।
कसरी कपडामा जुम्रा पुगे भन्नेबारे अहिलेसम्म केही स्पष्ट छैन । उत्पादन गर्दा, स्टोरमा ल्याउँदा वा स्टोरमा ल्याइसकेपछि जुम्रा परेको हुनसक्ने अनुमान गरिएको छ ।
आफूले काम गर्ने स्टोरमा कपडामा जुम्रा भएको पोष्ट गर्ने कर्मचारीको जागिर जानसक्नेबारे ट्वीटरमा धेरैले चिन्ता व्यक्त गरेका छन् । तर ती कर्मचारीले आफूले शुक्रबारमात्र काम गर्ने र त्यसपछि राजिनामा दिने स्पष्ट पारेकी छिन् ।
उनले आफ्नो ट्वीटर पोष्ट यसरी भाइरल होला भन्ने नसोंचेको र त्यसका लागि म्यानेजरसँग माफी मागेकी छिन् । यसका लागि म्यानेजरको नभई कम्पनीको गल्ती भएको उनको भनाई छ ।