१५ हजारमाझ टाइम्स स्क्वायरमा ‘न्युइयर इभ’ मनाउने तयारी
प्रकाशित मिति : पुस ८, २०७८ बिहीबार
न्युयोर्क सिटीले टाइम्स स्क्वायरमा ‘न्युइयर इभ’ मनाउने कार्यक्रममा परिमार्जन गरेर बढीमा १५ हजारमात्र भेला हुन पाउनेगरी कार्यक्रम गर्ने तयारी गरेको छ । महामारी अगाडिको भींडभन्दा झण्डै चारगुणा कम व्यक्तिको उपस्थीतिमा टाइम्स स्क्वायरमा नयाँ बर्षको पूर्व सन्ध्यामा कार्यक्रम गरिने भएको छ ।
न्युयोर्कमा कोरोना संक्रमणको अवस्था तीब्र बनिरहेको अवस्थामा र संक्रमितमध्ये अधिकांशमा ओमिक्रोन भेरियन्ट भेटिएको अवस्थामा मेयर बिल ब्लाजिओले नयाँ बर्षको ‘बलड्रप’ कार्यक्रममा परिमार्जनको घोषणा गरेका हुन् । न्युयोर्कको टाइम्स स्क्वायरमा नयाँ बर्षको पूर्व सन्ध्यामा खसालिने क्रिस्टल बल विश्वभरका लागि आकर्षणको केन्द्र बन्दै आएको छ ।
नयाँ बर्षको अघिल्लो दिन टाइम्स स्क्वायरमा ३ बजेपछिमात्र प्रवेशको अनुमति दिइनेछ । कम्तीमा १४ दिन अगाडि भ्याक्सिनको पूर्ण डोज लगाएको प्रमाणसहित फोटोसहित परिचयपत्र देखाएपछिमात्र टाइम्स स्क्वायरमा प्रवेश पाइनेछ । ५ बर्षभन्दा माथिका सबैले भ्याक्सिन लगाएको प्रमाण देखाउनुपर्नेछ ।
भ्याक्सिन लगाउन योग्य नभइसकेका बालबालिकाहरु टाइम्स स्क्वायरको कार्यक्रममा उपस्थीत हुन त पाउनेछन् । तर उनीहरु भ्याक्सिन लगाएका बयस्क अभिभावकका साथमा जानुपर्नेछ । अपांगता भएका कारण भ्याक्सिन लगाउन नसकेकाहरुले ७२ घण्टाभित्रको कोरोनाको पीसीआर परीक्षणको नेगेटिभ रिपोर्ट देखाउनुपर्नेछ ।
नयाँ बर्षको कार्यक्रमबारे आगामी दिनमा थप परिवर्तन समेत हुनसक्ने जनाइएको छ ।
गतबर्षको टाइम्स स्क्वायरको कार्यक्रम सामाजिक दूरी कायम गरेर आयोजना गरिएको थियो भने अत्यावश्यक कामदारहरुको सानो समुहमात्र उपस्थीत भएको थियो । मेयर ब्लाजिओले एक महिना अगाडि यो बर्षको नयाँ बर्षको कार्यक्रम पूरै तागतका साथ गरिने बताएपनि ओमिक्रोन भेरियन्टको बृद्धिसँगै कार्यक्रममा परिवर्तन गरिएको हो ।