सम्बन्धविच्छेदको मुद्दामा दुबईका शासकले कान्छी पत्नीलाई ५५४ मिलियन पाउण्ड दिनुपर्ने फैसला
प्रकाशित मिति : पुस ७, २०७८ बुधबार
दुबईका अर्बपति शासक शेख मोहम्मद बिन राशिद अल मकतुम र उनकी पूर्व पत्नी प्रिन्सेस हया बिन्त अल हुसेनबीच सम्बन्ध विच्छेदका लागि अनुमति प्राप्त भएको छ । तर यस अनुमतिमा दुबईका शासक मकतुमले ५५४ मिलियन बेलायती पाउण्ड (७३४ मिलियन डलर) भन्दा धेरै रकम पूर्व पत्नीलाई दिनुपर्ने भएको छ ।
यसलाई बेलायती कानुनी इतिहासमा सम्बन्धविच्छेदको सबैभन्दा ठूलो घटना रुपमा लिइएको बीबीसीले जनाएको छ । बेलायती हाई कोर्टले प्रिन्सेस हया बिन्त अल हुसेनलाई तीनमहिनाभित्र २५१ मिलियन पाउण्ड दिनुपर्ने फैसला सुनाएको थियो । फैसलामा दुई बालबालिकालाई बार्षिक ११ मिलियन पाउण्ड रुपमा दिन भनिएको छ । जसका लागि २९० मिलियन पाउण्डको बैंक ग्यारेन्टी दिनुपर्नेछ ।
हया जोर्डनका पूर्व शासक हुसेनकी छोरी हुन् । उनी अहिले ४७ वर्षकी छन् ।
शेख मोहम्मद बिन राशिद अल मकतुम संयुक्त अरब इमिरेट (यूएई) का प्रधानमन्त्री हुन् । उनले ६ वटा विहे गरेका थिए । हया उनकी कान्छी श्रीमती थिइन् । बेलायती अदालतले प्रिन्सेस हायालाई दिइने रकमले दुई सम्पन्तको हेरचाह, सुरक्षा बजेट, बिदा, एक नर्स, कामदारको ज्याला र उनको बस्ने खर्च, परिवारका लागि गाडी र पाल्तु जनावरको लागि गरिने खर्च हुने जनाइएको छ ।
हाया आफ्ना छोराछोरीका साथ २०१९ मा दुबईबाट भागर बेलायत पुगेकी थिइन् । उनले पतिबाट आफ्नो ज्यानमा खतरा भएको बताउकी थिइन् ।