न्युयोर्क सिटीमा सिटी संचालित खोप केन्द्रमा नयाँबर्ष अगाडि बुस्टर लगाउनेलाई सय डलर
प्रकाशित मिति : पुस ६, २०७८ मंगलबार
न्युयोर्क सिटीमा सिटी संचालित खोप केन्द्रमा नयाँबर्ष अगाडि कोरोनाबिरुद्धको खोपको बुस्टर शट लगाउनेलाई एकसय डलर उपहार दिइने भएको छ । आजैदेखि नयाँ बर्षको पूर्वसन्ध्या अर्थात् डिसेम्बर ३१ सम्म बुस्टर शट लगाउनेहरुले १ सय डलर प्राप्त गर्नेछन् ।
न्युयोर्क सिटीका मेयर बिल डे ब्लाजिओले मंगलबार यो कार्यक्रमको घोषणा गरेका हुन् । अमेरिकाभरकै सबैभन्दा ठूलो बुस्टर प्रोत्साहन कार्यक्रमका रुपमा यो कार्यक्रम ल्याइएको हो । न्युयोर्क सिटीका बासिन्दाहरु सोमोससँग सहकार्य गरेको भ्याक्सिन केन्द्रमा गएर खोप लगाउँदा पनि एकसय डलर प्राप्त गर्नेछन् ।
कोरोनाको ओमिक्रोन भेरियन्ट फैलिरहेको बेला यो कार्यक्रम घोषणा गरिएको हो । न्युयोर्क सिटी अर्कोपटक शट डाउन नहुने र पछिल्लो प्रोत्साहन कार्यक्रमले धेरैलाई बुस्टर शट लगाउन प्रेरित गर्ने मेयर ब्लाजिओको भनाई छ । मोडेर्ना र फाइजर दुबैले बुस्टर शट लगाउँदा ओमिक्रोन भेरिन्टबिरुद्ध उल्लेखनीय संरक्षण प्राप्त हुने तथ्यांक सार्वजनिक गरिसकेका छन् ।
यो कार्यक्रम यसअगाडि न्युयोर्क सिटीमा कोरोनाबिरुद्धको भ्याक्सिन लगाउँदा एकसय डलरको गिफ्ट कार्ड प्राप्त हुने कार्यक्रमसँग मिल्दो जुल्दो रहेको छ । न्युयोर्क सिटीबाट संचालिन भ्याक्सिन केन्द्र र सोमोससँगको सहकार्यमा संचालिन भ्याक्सिन केन्द्रबाहेक अन्य केन्द्रमा भ्याक्सिनको बुस्टर शट लगाउँदा भने एकसय डलर प्राप्त हुनेछैन ।