अमेरिकामा कोरोना संक्रमितमध्ये ७३ प्रतिशतमा ओमिक्रोन
प्रकाशित मिति : पुस ५, २०७८ सोमबार
अमेरिकामा कोरोना संक्रमितहरुमध्ये ७३ प्रतिशतमा ओमिक्रोन भेरियन्ट पुष्टी भएको छ । सीडीसीले सोमबार सार्वजनिक गरेको तथ्यांक अनुशार अमेरिकामा कोरोनाको ओमिक्रोन भेरियन्ट एकसातामा ६ गुणाले बृद्धि भएको देखिएको छ ।
डिसेम्बर ११ देखि १७ सम्मको अवधिमा अमेरिकामा कोरोना परीक्षण गर्दा संक्रमण पुष्टी भएकाहरुमध्ये अधिकांश अर्थात् ७३ प्रतिशतमा ओमिक्रोन पुष्टी भएको हो । न्युयोर्क क्षेत्रमा ९० प्रतिशतभन्दा धेरै संक्रमणका लागि ओमिक्रोन जिम्मेबार देखिएको छ ।
अमेरिकाभर गतसातामात्र ६ लाख ५० हजारभन्दा धेरैमा ओमिक्रोन पुष्टी भएको छ । जुनको अन्तिमसम्म अमेरिकामा संक्रमणको मुख्य कारण डेल्टा भेरियन्ट देखिएको थियो । नोभेम्बरको अन्तिमसम्म पनि ९५ प्रतिशत संक्रमण डेल्टा भेरियन्टकै कारण देखिएको थियो । तर डिसेम्बरको छोटो अवधिमा नै ओमिक्रोनले उछिनेको छ ।
दक्षिण अफ्रिकाका वैज्ञानिकहरुले ओमिक्रोनबारे सचेत गराएपछि नोभेम्बर २६ मा विश्व स्वास्थ्य संगठनले यसलाइै भेरियन्ट अफ कन्सर्न नामाकरण गरेको थियो । अहिले विश्वका ९० वटाभन्दा धेरै देशमा ओमिक्रोन भेरियन्ट फैलिसकेको छ ।