न्युयोर्क विमानस्थलमा कोरोना परीक्षण गर्दा ४ घण्टासम्म लामो लाइन, पहिले नै परीक्षण गर्न सुझाव
प्रकाशित मिति : पुस ५, २०७८ सोमबार
न्युयोर्कको जोन अफ केनेडी विमानस्थलबाट उडान गर्नेहरुले विमानस्थलमा कोरोना परीक्षण गर्दा अत्यन्तै लामो लाइनका कारण ४ घण्टासम्म लाग्ने गरेको छ । लाइन अत्यन्तै लामो भएकाले कोरोना परीक्षणका क्रममा लामो समय लाग्ने गरेको विमानस्थलले ट्वीट गरेको छ ।
विमानस्थलमा कोराना परीक्षण स्थलहरु दिनभरमात्र संचालन हुने अधिकारीहरुले बताएका छन् । यदि आफ्नो गन्तव्यमा कोरोनाको नेगेटिभ रिपोर्ट आवश्यक भएको खण्डमा विमानस्थल आउनुभन्दा अगाडि नै परीक्षण गराएर नेगेटिभ रिपोर्ट सहित आउने विमानस्थलले कडा सुझाव दिएको छ ।
न्युयोर्क र न्युजर्सीमा कोरोना संक्रमणका मामलाहरु उच्च भएको अवस्थामा र ओमिक्रोन भेरियन्ट समेत फैलदो भएको अवस्थामा आइतबार जोन अफ केनेडी विमानस्थलमा अत्यन्तै लामो लाइन भएको हो । चाडवाडको मौषम भएकाले पनि विमानस्थलबाट उडान गर्नेहरुको संख्यामा अत्यन्तै बृद्धि भएको छ ।
जेएफके विमानस्थलमा सर्वसाधारणका लागि तीनवटा कोरोना परीक्षण स्थलहरु रहेका छन् । तर विमानस्थलमा लामो समय लाग्दा यात्रुका उडानहरु छुट्ने सम्भावना समेत रहन्छ । त्यसैले न्युयोर्कभर रहेका निशुल्क कोरोना परीक्षणस्थलहरुमा कोरोना परीक्षण गराएर विमानस्थल पुग्न सकिन्छ ।
विमानस्थलमा परीक्षण गर्दा टर्मिनल १ मा रहेको परीक्षण स्थलमा एकघण्टा भन्दा कम अवधि रिपोर्ट आउने एन्टीजेन टेस्टका लागि १७९ डलर र १ घण्टामा रिपोर्ट आउने एक्सप्रेस पीसीआरका लागि २२० डलर तिर्नुपर्छ । त्यस्तै टर्मिनल ४ मा १ घण्टाभित्र रिपोर्ट आउने पीसीआर परीक्षणका लागि २५० डलर शुल्क तिर्नुपर्छ । टर्मिनल ५ को एयरट्रेन स्टपमा भने न्युयोर्क सिटी हेल्थ एण्ड हस्पिटलले विहान ८ बजेदेखि बेलुका ७ बजेसम्म वाकइन निशुल्क कोरोना परीक्षण गर्दै आएको छ ।
गतबर्षको यही अवधिको तुलनामा जोन अफ केनेडी विमानस्थलबाट बाहिरिने यात्रुहरुको संख्या दोब्बर भएको छ । यद्यपी कोरोना महामारीभन्दा अगाडिको सन् २०१९ को सोही अवधिको तुलना गर्दा भने यो संख्या कम नै हो । विज्ञहरुले कोरोनाको नेगेटिभ रिपोर्टका साथमा भ्याक्सिन लगाएको प्रमाण समेत बोक्न सुझाव दिएका छन् ।