डेमोक्रेटिक सिनेटर मन्चिनले डेमोक्र्याट्सका मुख्य योजना समेटिएको बजेट बिलमा मतदान नगर्ने
प्रकाशित मिति : पुस ४, २०७८ आईतबार
डेमोक्रेटिक सिनेटर जो मन्चिनले बजेट प्रकृयाबाट अगाडि बढाउन तय भएको १ दशमलव ७ ट्रिलियन डलरको डेमोक्रेटिक बिलमा मतदान नगर्ने घोषणा गरेका छन् । बजेट पकृयाबाट सामान्य बहुमतले बिल पारित गर्नका लागि सबै डेमोक्रेटिक सिनेटरहरुले अनिवार्य मतदान गर्नुपर्ने भएपनि मन्चिनको घोषणाले डेमोक्र्याट्सका मुख्य घरेलु नीतिहरु समेटिएको यो बिलको मृत्यु हुने सम्भावना उच्च भएको छ ।
पचास पचासमा विभाजित सिनेटमा बजेट प्रकृयाबाट बिल पारित गर्दा उपराष्ट्रपतिको मतसहित डेमोक्र्याट्सका ५१ मत आवश्यक पर्ने भएकाले एउटामात्र डेमोक्रेटिक सिनेटरले मत नदिंदा बिल पारित हुनमा समस्या हुनेछ । आफूले मानवीय रुपमा सबै सम्भव प्रयासहरु गरेको र यो बिल अगाडि बढाउनका लागि मतदान गर्न नसक्ने मन्चिनले बताएका छन् ।
मुद्रास्फीति, राष्ट्रिय ऋण र कोरोना महामारीलाई उल्लेख गर्दै उनले आफूले यस्तो निर्णय लिनुपरेको बताएका छन् । डेमोक्रेटिक सांसदहरु देशलाई खतराहरुबाट अझ बढी जोखिममा राख्नेगरी समाजलाई नाटकीय रुपमा पुननिर्माण गर्न कटिबद्ध रहेको उनले आरोप लगाएका छन् ।
केही साता अगाडि सिनेटर मन्चिनले यो बिललाई अगाडि बढाउन राष्ट्रपति समक्ष प्रतिवद्धता जनाएको र उनका टिप्पणीहरु राष्ट्रपतिसँगको छलफलमा भएका कुराहरुसँग बाझिएको ह्वाइट हाउस प्रेस सेक्रेटरी जेन पास्कीको भनाई छ । बिलमा मतदान गर्न नसक्ने आफ्नो धारणा सार्वजनिक गर्नु अगाडि आइतबार मन्चिनले यसबारे ह्वाइट हाउस र संसदमा डेमोक्रेटिक नेताहरुलाई आफ्नो योजनाबारे जानकारी दिएका थिए ।
मन्चिनले सन् २०१० मा सिनेटरका रुपमा निर्वाचित भएयता नै हरेक विषयमा दुईदलीय समन्वयका लागि दवाव श्रृजना गर्दै आएका छन् । मध्यपन्थी धारका डेमोक्र्याट्स मानिने मन्चिन सन् २०१० देखि वेष्ट भर्जिनियाबाट सिनेटरमा प्रतिनिधित्व गर्दै आएका छन् । सबै अमेरिकनको आवश्यकतालाई सम्बोधन गर्न र राष्ट्रको स्वतन्त्रता, सुरक्षा एवं जीवनशैली जोखिममा नपर्नेगरी दुबै छेउका सहकर्मीसँग काम गर्न जारी राख्ने मन्चिनले बताएका छन् ।
प्रगतिशील डेमोक्र्या्सहरुले मन्चिनको यो घोषणाको आलोचना गरेका छन् । नोभेम्बरमा मन्चिनले बिल्ड ब्याक बेटर नामको यो बिललाई समर्थन गर्ने आशामा डेमोक्र्याट्सहरुले १ ट्रिलियन डलरको पूर्वाधार योजना पारित गरेका थिए ।