केन्टकी विनाश लगत्तै मध्य अमेरिकामा १ सय माइल प्रतिघण्टासम्मका हावाहुरी, ५ लाख घर अन्धकार
प्रकाशित मिति : पुस १, २०७८ बिहीबार
अमेरिकाको केन्टकी लगायतका राज्यमा आँधीबेहरीले ठूलो विनाश गरे लगत्तै मध्य अमेरिकाका कैयन राज्यमा १ सय माइल प्रतिघण्टामा हावाहुरी चल्दा विहिबार विहानसम्म झण्डै ५ लाख घरमा विद्युत आपूर्तिमा अवरोध उत्पन्न भएको छ । विसकन्सिन र मिसिगन क्षेत्रमा सबैभन्दा धेरै विद्युत आपूर्तिमा अवरोध उत्पन्न भएको छ ।
ग्रेट प्लेन र मिडवेष्ट क्षेत्रमा ७५ माइल प्रतिघण्टाभन्दा माथिका तूफानजत्तिकै शक्तिशाली कम्तीमा ५५ वटा बतास आएको राष्ट्रिय मौषम सेवाले जनाएको छ । उक्त क्षेत्रमा बुधबार झण्डै ३ सय वटा गम्भिर प्रकारका बतास चलेको जनाइएको छ । जसले गर्दा झण्डै ८० मिलियनलाई चनाखो बस्नुपर्ने अवस्था आएको थियो ।
दक्षिणपूर्वी मिनेसोटामा डिसेम्बरको महिनामा पहिलोपटक तूफान आएको छ । बुधबारमात्र मिनेसोटा, आयोवा र नेब्रास्कामामात्र २० वटा तूफान आएका छन् । कोलोराडो लगायतका क्षेत्रमा बुधबार एकसय माइल प्रतिघण्टामाथिका तूफान चलेका थिए । लामरमा एकसय ७ माइल प्रतिघण्टासम्म तूफान चलेको थियो । जसका कारण कैयनका छाना उडाएको छ भने कैयन रुख ढलेका छन् ।
हावाले सिसाको बाकसलाई २५६ फिट माथी उडाएपछि कन्सास सिटीको अन्तर्राष्ट्रिय विमानस्थल नै केहीबेर खाली गराइएको थियो । झण्डै एकघण्टापछि उडानहरु सुचारु भएको घोषणा गरिएको थियो । धुलो उडेर कुइरीमण्डल भएपछि पश्चीम कन्सासको इन्टरस्टेस ७० हाइवेको केही भाग बन्द गरिएको थियो ।