न्युयोर्कको जोन अफ केनेडी विमानस्थलमा साढे ९ बिलियन लागतमा अत्याधुनिक टर्मिनल बन्ने
प्रकाशित मिति : मंसिर २८, २०७८ मंगलबार
न्युयोर्कको जोन अफ केनेडी अन्तर्राष्ट्रिय विमानस्थलमा साढे ९ बिलियन डलरको लागतमा नयाँ टर्मिनल बन्ने भएको छ । न्युयोर्क गभर्नर क्याथी होचुल र पोर्ट अथोरिटी कार्यकारी निर्देशक रिक कटनले नयाँ टर्मिनल निर्माणको घोषणा गरेका हुन् ।
२३ वटा गेटहरु भएको नयाँ टर्मिनलले अहिलेको एकजोडी टर्मिनलाई विस्थापन गर्नेछ । २४ लाख स्क्वायर फिटमा बन्ने उक्त टर्मिनल निर्माणपछि यो न्युयोर्कको जोन अफ केनेडी विमानस्थल भन्न लायक हुने गभर्नर होचुलले बताइन् ।
यो बृहत निर्माण योजना निजीक्षेत्रको रकमको लगानीमा हुने भएको हो । यसमा तीनवटा लगानी तथा व्यवस्थापन कम्पनीहरुले लगानी गर्ने जनाइएको छ । यो निर्माण सन् २०२० मा नै सुरु हुने प्रारम्भिक योजना रहेपनि कोरोनाको महामारीका कारण निर्माण सुरु गर्नमा ढिलाई भएको हो ।
अब अर्को बर्षदेखि निर्माण सुरु हुने र निर्माण पूरा हुन झण्डै १० बर्ष लाग्ने अनुमान गरिएको छ । टर्मिनलका पहिलो दुईतिहाई गेटहरु भने सन् २०२६ मा खुला गर्ने योजना बनाइएको छ । दोश्रो चरणको निर्माण सन् २०२८ मा पूरा हुने अपेक्षा गरिएको छ । परियोजना पूरा हुन भने सन् २०३० सम्म लाग्ने जनाइएको छ ।
जोन अफ केनेडी विमानस्थलका टर्मिनलहरु मर्मत र पुननिर्माणका योजनाहरु अन्तरगत यो पछिल्लो योजनाको घोषणा गरिएको हो । तर नयाँ टर्मिनल ६ को तुलनामा यो टर्मिनल १ को बजेट भने दुईगुणाभन्दा पनि बढी छ । टर्मिनल ६ को पुननिर्माणमा ३ दशमलव ९ बिलियन डलर लागत रहेको छ ।