७० भन्दा बढीको ज्यान जाने गरी आएको आँधीबेहरीपछि केन्टकीमा संकटकाल, बेलुका ७ बजेपछि कर्फ्यु
प्रकाशित मिति : मंसिर २५, २०७८ शनिबार
केन्टकीमा ७० भन्दा बढीको ज्यान जाने गरी आएको आँधीबेहरीपछि संकटकालको घोषणा गरिएको छ । राष्ट्रपति जो बाइडेनले केन्टकीमा संघीय संकटकाल स्वीकृत गरेका छन् । यस अगाडि केन्टकीका गभर्नरले राज्य संकटकालको घोषणा गरेका थिए । राज्य संकटकाल घोषणापछि गभर्नरले संघीय संकटकाल घोषणाका लागि ह्वाइट हाउस समक्ष अनुरोध गरेका थिए ।
आँधीबेहरीबाट सबैभन्दा प्रभावित मेफिल्ड सिटीमा आज बेलुका ७ बजेदेखि लागु हुनेगरी निषेधाज्ञा जारी गरिएको छ । आपतकालिन सहायताकर्मीहरुबाहेक अरुलाई बेलुका ७ बजेदेखि बाहिर ननिस्कन भनिएको छ । केन्टकीका गभर्नर एन्डी बेशियरले यस्तो विनाश जीवनमै पहिलोपटक देखेको बताएका छन् ।
राष्ट्रपति जो बाइडेनले यो आँधीबेहरीलाई अमेरिकी इतिहासकै ठूलोमध्येको एक बताएका छन् । कतिजनाको ज्यान गयो भन्ने यकिन विवरण अहिलेसम्म नआएको भन्दै बाइडेनले यसलाई अत्यन्तै दुखद भएको बताएका छन् । संघीय सरकारले सहायताका लागि सबै चिज गर्ने उनले बताएका छन् ।
गभर्नर एन्डी बेशियरले आँधीबेहरीबाट ज्यान गुमाउनेको संख्या एकसय नाघ्ने अनुमान गरेका छन् । शुक्रबार राती दक्षिणपश्चिम केन्टकीका कैयन भाग आँधीबेहरीको चपेटमा परेका थिए । केन्टकीको इतिहासमा नै सबैभन्दा खराब आँधीबेहरी भएको गभर्नरको भनाई छ । राज्यका कम्तीमा १५ काउन्टीहरुबाट क्षतिका विवरणहरु आएका छन् ।
आँधिबेहरी आउँदा मेफिल्ड सिटीमा एउटा मैनबत्ति उद्योगमा झण्डै ११० जनाले काम गरिरहेको र उनीहरुमध्ये दर्जनौंले ज्यान गुमाएको जनाइएको छ । यो सिटीमा झण्डै १० हजार जनाको बसोबास रहेको छ ।
अर्कान्सास र इलिनोयमा पनि आँधिबेहरीका कारण कैयनको ज्यान गएको छ । पाँचवटा राज्यहरु अर्कान्सास, इलिनोय, केन्टकी, मिजौरी र टेनेसीमा कम्तीमा २४ वटा आँधीबेहरी रिपोर्ट गरिएको छ । सप्ताहन्तमा मौषम अझ खराब बन्दै जाने मौषमविदहरुले चेतावनी दिएका छन् ।
उत्तरपूर्वी अर्कान्सासमा कम्तीमा एकजनाको मृत्यु भएको छ भने कम्तीमा २० जना घाइते भएका छन् । त्यस्तै लेचभिलमा अर्को एकजनाको मृत्यु भएको छ । इलिनोयमा अमेजनको वायरहाउसमा क्षति पुग्दा कम्तीमा २ जनाले ज्यान गुमाएको जनाइएको छ ।
आँधीबेहरीबाट टेनेसीमा १ लाख ३२ हजार भन्दा धेरै घरमा विद्युत आपूर्तिमा अवरोध उत्पन्न भएको छ । त्यस्तै केन्टकीमा ६० हजार, अर्कान्सासमा २५ हजारभन्दा धेरै, इलिनोयमा २४ हजार भन्दा धेरै र मिजौरीमा १० हजारभन्दा धेरै घरमा विद्युत आपूर्तिमा अवरोध उत्पन्न भएको छ । शनिबार विहानसम्म ३ लाख घरमा विद्युत आपूर्तिमा अवरोध उत्पन्न भएको जनाइएको छ ।