Follow @khasokhasmag

सामाजिक सञ्जालमा प्रभावशालीहरुले अमेरिकाको तीनबर्षे कामदार भिसा पाउनसक्ने


प्रकाशित मिति : मंसिर २२, २०७८ बुधबार

सामाजिक सञ्जालमा प्रभावशाली रहदै आएका सोसल मिडिया इन्फ्लुयन्सरहरुले पनि अमेरिकाको तीनबर्षको कामदार भिसा पाउनसक्ने कानून व्यवसायीहरुको भनाई छ । कानून व्यवसायीहरु डेभिड न्याचम्यान, लुड्का जिमोभ्काक, स्नेहल बात्रा र समान्था चार्सवर्थले सामाजिक सञ्जालमा प्रभावशालीहरुले पनि अमेरिकाको ओ वान बी भिसा प्राप्त गर्नसक्ने बताएका छन् ।

कुनै पनि सामाजिक सञ्जालमा लोकप्रियता र विश्वसनीयता कमाएकाहरुले अमेरिकामा बस्ने र काम गर्ने अवशरको खोजी गरिरहेको खण्डमा उनीहरुले ओ वान बी भिसाका लागि आवेदन दिन सक्नेछन् । उनीहरु यो भिसामा काम सम्बन्धित अवशरका लागि अमेरिका प्रवेश गर्न सक्छन् । यद्यपी आवेदक राष्ट्रिय वा अन्तर्राष्ट्रियरुपमा ख्यातीप्राप्त र प्रभावशाली हुनुपर्छ ।

सामाजिक सञ्जालमा प्रभावशाली रहेको उक्त आवेदक अमेरिकामा आइसकेपछि अमेरिकन कम्पनीमा काम गर्न र उक्त कम्पनीको सामाजिक सञ्जालमा प्रचारात्मक गतिविधि गर्न इच्छुक हुनुपर्छ । यात्रा, खेल, फेशन, जीवनशैली लगायतका क्षेत्रमा आवेदकका व्यापक फ्लोअर हुनुपर्छ ।

ओ वान बी भिसा आधारभूत रुपमा चलचित्र र टेलिभिजन क्षेत्रमा असाधारण क्षमता देखाएका कलाकार र प्रस्तुतकर्ताहरुका लागि तय गरिएको भिसा हो । तर सामाजिक सञ्जालमा प्रभावशाली हुनुपनि व्यवसायिक सफलता र पहिचान भएकाले ओ वान बी श्रेणीमा भिसाका लागि सामाजिक सञ्जालमा प्रभाव राख्नेहरुलाई पनि समावेश गरिएको छ ।

यो भिसा तीनबर्षको हुन्छ भने एकबर्षसम्म थप गर्न समेत सकिन्छ । जुन कामका लागि आएको हो, त्यो पूरा गर्न अझै समय लाग्ने युएससीआईएसले निर्धारण गरेको खण्डमा एकबर्षसम्म भिसा थप गरेर ४ बर्षसम्म अमेरिकामा बस्न सकिन्छ । भिसाको मान्यता अवधिभन्दा १० दिन अगाडि नै अमेरिका आउन पाइने र मान्यता अवधि सकिएको १० दिनसम्म अमेरिका बस्न सकिने भएपनि कामभने मान्यता अवधिभित्र मात्र गर्नुपर्ने प्रावधान रहेको छ ।

भिसाको अवधि थप्नका लागि आई १२९ आवेदन, आई ९४ को प्रतिलिपी र भिसा थप्नुपर्नाको कारण उल्लेख गरेर पठाउनुपर्छ । ओ वान बी भिसा अमेरिकी रोजगारदाता वा अमेरिकी एजेण्ट वा अमेरिकी एजेण्टमार्फत विदेशी रोजगारदाताले पनि आवेदन दिनसक्छ । अमेरिका आएर काम सुरु गर्ने आशय भएको मितिभन्दा कम्तीमा ४५ दिन अगाडि रोजगारदाताले युएससीआईएस समक्ष आई १२९ आवेदन पेश गर्नुपर्छ ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com