Follow @khasokhasmag

जर्मन चान्सलरमा ओलाफ स्चोल्ज निर्वाचित, १६ वर्ष लामो मर्केल युगको अन्त्य


प्रकाशित मिति : मंसिर २२, २०७८ बुधबार

जर्मनीको चान्सलरमा सोसल डेमोक्रेटिक पार्टीका ओलाफ स्चोल्ज निर्वाचित भएका छन् । एङ्गेला मर्केलको सरकारमा अर्थ मन्त्री समेत रहेका ओलाफलाई बुधबारको संसद बैठकले चान्सलरमा निर्वाचित गरेको हो । उनी निर्वाचित भएसँगै वर्तमान चान्सलर एङ्गेला मर्केलको स्थानमा ओलाफको उदय भएको हो । अर्थमन्त्री ओलाफको पार्टी एसपीडीले गत हप्ता ग्रिन्स एण्ड लिवरल फ्रि डेमोक्रेटस् एफडीपीसँग गठवन्धन गरेकाले उनी चान्सलर बन्ने सुनिश्चित पहिले नै भएको थियो ।

विदा हुन लागेकी चान्सलर मर्केल नेतृत्वको पहिलो सरकारमा सन् २००७ देखि २००९ सम्म ओलाफ श्रम मन्त्री बनेका थिए । त्यसपछि उनी सन् २०१५ मा भाइस चान्सलर तथा अर्थमन्त्री बनेका हुन् । झण्डै १६ वर्ष निरन्तर जर्मनीको चान्सलर भएर मर्केलले विदा लिन लागेकी छिन् । चान्सलर हुँदा उनी सधैँ विश्वका चर्चित तथा शक्तिशाली नेताको सूचीमा पर्दै आएकी थिइन् ।

गत सेप्टेम्बरमा भएको चुनावमा मर्केलको मध्यम दक्षिणपन्थी पार्टी क्रिश्चियन डेमोक्रेटिक युनियन र त्यसको बेभेरियन साझेदार क्रिश्चियन सोसल युनियनका तुलनामा बढी सिट ल्याएर सोसल डेमोक्रेटिक पार्टी विजयी भएको थियो । दशौं लाख मतदाताहरुले १६ बर्षपछि मर्केलको विकल्प छान्न त्यहाँको संसदको तल्लो सदन बुन्डेस्टागको निर्वाचनमा मतदान गरेका थिए ।

सबै २९९ निर्वाचन क्षेत्रको चुनावी परिणाम आइसक्दा सोसल डेमोक्रेटिक पार्टी २५ दशमलव ७ प्रतिशत , मर्केलको क्रिश्चियन डेमोक्रेटिक युनियन २४ दशमलव १ प्रतिशत , ग्रिन पार्टी ११४ दशमलव ८  प्रतिशत र फ्रि डेमोक्रेटिक पार्टी ११ दशमलव ५ को स्थानमा देखिएको थियो । त्यसपछि गठबन्धन सरकार बनाउने पहल सुरु भएको थियो ।

सन् २०१७ को सेप्टेम्बरमा मर्केलले चुनावमा जीत हासिल गर्दा गठबन्धन सरकार बनाउन ५ महिनाभन्दा बढी समय लागेको थियो । तर यसपटक ३ महिनाभन्दा छोटो समयमा चान्सलर चुनिएका छन् । युरोपको सबैभन्दा ठूलो अर्थतन्त्रका रुपमा रहेको जर्मनीमा अब नयाँ युगको सुरुवात हुने अपेक्षा गरिएको छ ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com