ओमिक्रोन भेरियन्ट डेल्टाभन्दा कम खतरनाक, यात्रा प्रतिबन्ध हटाउनेबारे विचार गर्दै अमेरिका
प्रकाशित मिति : मंसिर २०, २०७८ सोमबार
कोरोनाको ओमिक्रोन भेरियन्ट डेल्टाभन्दा कम खतरनाक रहेको अमेरिकी स्वास्थ्य अधिकारीहरुको प्रारम्भिक निष्कर्ष रहेको छ । ओमिक्रोन भेरियन्ट विश्व र अमेरिकामा तीब्र गतिमा फैलिएपनि प्रारम्भिक संकेत अनुशार यो भेरियन्ट डेल्टाभन्दा कम खतरनाक रहेको देखिएको अमेरिकी स्वास्थ्य अधिकारीहरुले बताएका छन् । अमेरिकामा २० जनाभन्दा बढीमा ओमिक्रोन पुष्टी भएपनि कसैलाई पनि अस्पताल भर्ना गर्ने अवस्था आएको छैन ।
राष्ट्रपति जो बाइडेनका प्रमुख मेडिकल सल्लाहकार तथा अमेरिकाका बरिष्ठ सरुवा रोग विशेषज्ञ डाक्टर एन्थोनी फाउचीले ओमिक्रोनको प्रभावबारे अन्तिम निष्कर्षमा पुग्नु अगाडि वैज्ञानिकहरुले थप सुचना र तथ्यांकहरु प्राप्त गर्न आवश्यक रहेको बताएका छन् । दक्षिण अफ्रिकाबाट प्राप्त रिपोर्टहरु अनुशार ओमिक्रोन भेरियन्ट तीब्र गतिमा फैलिदो रहेपनि अस्पताल भर्ना हुने दर भने चिन्ता गर्नुपर्ने अवस्थामा नरहेको जनाईको छ ।
गम्भिरता एकदमै उच्च डिग्रीमा भएको जस्तो नदेखिने फाउचीको भनाई छ । तर डेल्टाको तुलनामा ओमिक्रोनले सिकिस्त नपार्ने वा कम खतरनाक रहेको अन्तिम निष्कर्ष निकाल्नु अगाडि सावधान हुनुपर्ने फाउचीले बताए । बाइडेन प्रशासनले ओमिक्रोनका कारण केही अफ्रिकन देशहरुबाट अमेरिका आउनमा लगाएको प्रतिबन्ध हटाउनेबारे विचार गरिरहेको समेत फाउचीले जानकारी दिए ।
अमेरिकाले अफ्रिकाका केही देशबाट अमेरिका आउनमा यात्रा प्रतिबन्ध लगाएपछि राष्ट्रसंघका महासचिव एन्टोनियो गुटिरेजले रंगभेदी निर्णय भन्दै आक्रोश व्यक्त गरेका थिए । अफ्रिकन देशहरुमा परेको कठिनायीका लागि आफूहरुलाई नराम्रो लागेको र उपयुक्त समयमा यो प्रतिबन्ध हटाउनेबारे विचार भइरहेको फाउचीले बताएका छन् ।
अमेरिकाका कैयन राज्यमा ओमिक्रोन पुष्टी भएपनि अहिलेसम्म अमेरिकामा डेल्टाले नै धेरै संक्रमण गराएको छ । झण्डै ९९ प्रतिशत संक्रमण डेल्टा भेरियन्टकै कारण भएको छ । अमेरिकी अधिकारीहरुले अमेरिकनहरुलाई भ्याक्सिन र बुस्टर शट लगाउन निरन्तर आग्रह गर्दै आएका छन् । ओमिक्रोन भेरियन्ट डेल्टाभन्दा कम खतरनाक रहेपनि यो समस्याका रुपमा भने रहने विश्व स्वास्थ्य संगठनले जनाएको छ ।