Follow @khasokhasmag

न्युयोर्कमा नयाँ ठगीधन्दा: लाखौं पुरस्कार जितेको भन्दै चेक पठाएर रकम ठगी


प्रकाशित मिति : मंसिर १९, २०७८ आईतबार

कतै तपाईले सुपरमार्केटको ग्राहक चिठ्ठामा जितेको भन्दै चेक सहितको चिठी प्राप्त गर्नुभएको त छैन ? यदि त्यस्तो पत्र प्राप्त गर्नुभएको छ भने तपाईमाथि ठगले जाल थापेको हुनसक्छ । न्युयोर्कबासीहरुले सुपरमार्केटको ग्राहक चिठ्ठामा रकम जितेको भन्दै ठगहरुबाट पत्रहरु प्राप्त गरिरहेका छन् ।

८ लाख ८० हजार डलर पुरस्कार जितेको भन्दै ठगले सुरुमा ८ हजार डलरको नक्कली चेक पठाउने गरेका छन् । यो चेक सक्कली जस्तो नै देखिन्छ । यो चेक पठाएपछि उनीहरुले ८ लाख ८० हजार डलरमध्येको बाँकी रकम पाउन ७ हजार डलर लाग्ने भन्दै रकम माग्ने गरेका छन् ।

यदि तपाईले उनीहरुले पठाएको ८ हजार डलरको नक्कली चेकमा विश्वास गरेर प्रकृया शुल्क भन्दै मागेको ७ हजार डलर उनीहरुलाई पठाउनुभएको खण्डमा तपाई उनीहरुको पञ्जामा पर्नुहुनेछ र ठगिनुहुनेछ । तपाईलाई उनीहरुले पठाएको ८ हजार डलरको चेक बैंकले क्लीयर नगरेपछि बैंकलाई शुल्क तिर्नुपर्नेछ भने तपाईले पुरस्कारको लोभमा बुझाएको ७ हजार डलर पनि जानेछ ।

ठगहरुले पठाएको पत्रमा बैंक प्रमाणित क्यासियर चेक पहिले नै तयार गरिएको र पठाउनमात्र बाँकी रहेको भन्दै प्रकृया शुल्कका नाममा मोटो रकम माग्ने गरेका छन् । टिम क्वालिटी कर्पोरेशन इन्कका नाममा पठाइएको पत्रमा फोन नम्बर समेत दिइएको छ भने अमेरिका र क्यानडामा कार्यालय रहेको भन्दै ठेगाना समेत दिइएको छ ।

न्युयोर्क राज्यका एटोर्नी जनरलको कार्यालयले यस्तो प्रकारका ठगीबारे सन् २०१९ यता १७२ वटा उजुरी प्राप्त भएको जनाएको छ । सन् २०२१ मा मात्र यस्ता ४६ वटा उजरी परेका छन् । संघीय व्यापार आयोगमा सन् २०२१ मा मात्र न्युयोर्कका सेवाग्राहीबाट यस्ता ३८५६ उजुरी परेका छन् । गतबर्षको तुलनामा यो ३० प्रतिशतले बढी हो ।

देशभरबाट भने यो प्रकारका ठगीका सन् २०२१ मा १ लाख ९ हजार ५ सय ५० उजुरीहरु परेका छन् । सन् २०२० को तुलनामा यो २६ प्रतिशतले बढी हो ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com