बेल्जियममा रुघा लागेका २ हिप्पोपोटामसमा परीक्षण गर्दा कोरोना संक्रमण पुष्टी
प्रकाशित मिति : मंसिर १९, २०७८ आईतबार
बेल्जियममा रुघा लागेका २ हिप्पोपोटामसमा परीक्षण गर्दा कोरोना संक्रमण पुष्टी भएको छ । बेल्जिमयको एन्टरपमा चिडियाखानामा रहेका इमानी र हर्मन नामका हिप्पोहरुमा परीक्षण गर्दा कोरोना संक्रमण पुष्टी भएको चिडियाखानाले जनाएको छ ।
उनीहरुमा नाकबाट सिगान बग्ने बाहेक अरु लक्षण भने नदेखिएको जनाइएको छ । उनीहरुलाई कोरोना भाइरस कसरी सरेको हो भन्नेबारे केही स्पष्ट छैन । हेरचाह गर्ने कोही पनि व्यक्तिलाई लक्षण देखिएको छैन भने परीक्षण गर्दा नेगेटिभ देखिएको छ ।
१४ बर्षको इमानी र ४१ बर्षको हर्मन हिप्पोलाई आइसोलेसनमा राखिएको छ । अर्थात् चिडियाखानाको भ्रमण गर्नेहरुले उनीहरुलाई अहिलेका लागि हेर्न नपाइने जनाइएको छ । हिप्पोपोटामसमा कोरोना संक्रमण भएको यो पहिलो घटना हो ।
चिडियाखानामा रहेका र पालेका जनावरहरुमा कोरोना संक्रमणका घटना विश्वभरी नै छन् । गतमहिना नेब्रास्कामा कोरोना संक्रमणबाट तीन हिमचितुवाको मृत्यु भएको थियो ।
हिमचितुवाहरु रेनी, एभरेष्ट र मकालुको निधन भएको थियो । लिंकन चिडियाखानाका दुईवटा सुमात्रा बाघहरु एक्सल र कुमारलाई पनि कोरोना संक्रमण भएको थियो । तर ति बाघहरु पनि निको हुन सफल भएका थिए ।
उक्त चिडियाखानामा पहिलो पटक जनावरलाई कोरोना संक्रमण अक्टोबर १३ मा भएको पुष्टी भएको थियो । जनावरहरुमा कोरोना संक्रमणको लक्षण देखिएपछि कर्मचारीले यसबारे थाहा पाएका थिए । थप संक्रमण हुन नदिन जनावरहरुलाई स्टेरोइड र एन्टीबायोटिकले उपचार गरिएको थियो ।
चिडियाखानामा रहेका अन्य जनावरलाई भने कोरोना संक्रमणको कुनै लक्षण देखिएको छैन । सीडीसीले मान्छेबाट जनावरमा कोरोना संक्रमण हुने सम्भावना अत्यन्तै कम हुने बताएको छ । तर कहिलेकाँही संक्रमणको सम्भावना भएको नकार्न नसकिने जनाएको छ ।