नर्थ क्यारोलिनामा झुक्किएर एउटै नम्बरका २ लोटरी किनेका व्यक्तिलाई ज्याकपट
प्रकाशित मिति : मंसिर १९, २०७८ आईतबार
नर्थ क्यारोलिनामा झुक्किएर एउटै नम्बरका २ लोटरी किनेका एकजनालाई दुईवटा ज्याकपट परेको छ । लक्की फर लाइफ नामको लटरी भरेको आफूलाई याद नभएपनि ज्याकपट जित्न सफल भएको उनले बताए ।
४९ बर्षका स्कटी थोमसले अनलाइनबाट लटरी टिकटको फर्म भरेका थिए । तर टेलिभिजनमा बास्केटबल खेल हेर्दै पल्टेको बेला अनलाइन फर्म भरेपनि आफूलाई भरे नभरेको भने याद नभएको उनले बताए ।
पहिलो लोटरी टिकटका लागि फर्म भरेको याद नभएपछि उनले सोही नम्बरमा दोश्रो पटक पनि फर्म भरेका थिए । भोलिपल्ट छोराले दुईवटा फरकफरक रकम सुचिकृत भएको बताएपछि मात्र उनले एउटै नम्बर दुईपटक भरेको थाहा पाएका थिए ।
नोभेम्बर २७ मा खोलिएको लोटरीमा उनलाई मासिक २५ हजार डलर प्राप्त गर्ने दुई लोटरी परेका थिए । यो लक्की फर लाइफ लोटरीको दोश्रो ठूलो पुरस्कार थियो । पहिलो पुरस्कार हरेक दिन १ हजार डलर पाउने थियो ।
आफूले लोटरी जितेको थाहा पाएपछि भूईमा लम्पसार परेको उनले बताए । सुरुमा आफूलाई विश्वास नै नलागेको उनले बताए । उनले मासिक रुपमा नभई ७ लाख ८० हजार एकमुष्ठ प्राप्त गरेका छन् । ट्याक्स कटाएर उनले कुल ५ लाख ५१ हजार ८ सय ५१ डलर प्राप्त गरेका छन् ।