बिल क्लीन्टनबिरुद्ध राष्ट्रपतिमा चुनाव लडेका बब डोलको ९८ बर्षको उमेरमा निधन

खसोखास अमेरिका ब्यूरो

---

प्रकाशित मिति : मंसिर १९, २०७८ आईतबार

अमेरिकाको राजनीतिमा ७९ बर्ष सेवा गरेका बरिष्ठ रिपब्लिकन नेता बब डोलको ९८ बर्षको उमेरमा निधन भएको छ । डोलले २७ बर्षसम्म कन्सासबाट अमेरिकी सिनेटरका रुपमा प्रतिनिधित्व गरेका थिए ।

सन् १९६९ देखि सन् १९९६ सम्म कन्सास सिनेटर डोलले सन् १९९६ को राष्ट्रपति चुनावमा बिल क्लीन्टनबिरुद्ध रिपब्लिकन पार्टीका तर्फबाट प्रतिस्पर्धा गरेका थिए । उनले राष्ट्रपति चुनावमा ४० दशमलव ७ प्रतिशत मत प्राप्त गरेका थिए ।

डोल दुईपटक सिनेटमा रिपब्लिकन पार्टीका तर्फबाट बहुमतप्राप्त दलको नेता समेत भएका थिए ।

सन् १९८७ देखि १९९६ सम्म उनी सिनेटमा अल्पमतमा रहेको रिपब्लिकन पार्टीको नेता थिए ।

सिनेटका महत्वपूर्ण कमिटिहरुमा काम गरेका उनी सन् १९६१ देखि सन् १९६९ सम्म कन्सासबाटै प्रतिनिधिसभामा सदस्य रहेका थिए ।

सन् १९५१ देखि सन् १९५३ सम्म उनी कन्सासको संसदमा समेत सदस्य रहेका थिए ।

सन् १९२३ मा कन्सासको रसेलमा जन्मिएका उनको निधन कन्सासमै भएको हो । दोश्रो विश्वयुद्धमा गम्भिर घाइते भएका उनले पटकपटक स्वास्थ्य समस्याको सामना गर्नुपरेको थियो ।

सन् १९९१ मा उनको प्रोस्टेट क्यान्सरको सर्जरी भएको थियो भने २००१ मा पेटको सर्जरी गरिएको थियो ।

सन् २००५ मा घरमै लडेका कारण अस्पताल भर्ना हुनुपरेको थियो भने सन् २००९ मा गोडामा भएको संक्रमणका कारण अस्पताल भर्ना हुनुपरेको थियो ।

गत फरबरीमा उनले फोक्सोको क्यान्सरको उपचार भइरहेको बताएका थिए ।