नाइट फायर क्याम्पको उत्कृष्ट पर्यटकीय गन्तव्य कालिपोखरी
प्रकाशित मिति : कार्तिक १९, २०७८ शुक्रबार
पछिल्लो केही वर्षयता रोल्पाको कालिपोखरीमा पर्यटकीय चहलपहल बढ्न थालेको छ । विश्वका विभिन्न मुलुकसहित नेपालमा पनि नयाँ भेरियन्टसहित दोस्रो चरणको कोरोना सङ्क्रमण देखिएपछि सरकारले लागू गरेको बन्दाबन्दी र निषेधाज्ञाले प्रायः बन्द जस्तै रहेको कालिपोखरीमा विस्तारै पर्यटकीय चहलपहल बढ्न थालेको हो । योसँगै कालिपोखरी नाइट फायरक्याम्पका रूपमा समेत महत्वपूर्ण गन्तव्य बन्न थालेको छ ।
रात बिताएर आनन्द लिनेहरुको सङ्ख्या बढ्दै जान थालेसँगै यसलाई नाइट फायरक्याम्पका रूपमा लिन थालिएको हो । रोल्पा सदरमुकाम लिवाङवाट चार किलोमिटर दूरीमा रहेको सो स्थानमा शुक्रबार रात बिताएर मनोरञ्जन लिनेहरूको सङ्ख्या बढ्न थालेको हो । हप्ताभर काम गरेर एक दिन आराम लिन चाहने सरकारी कर्मचारी तथा व्यवसायी नाइट फायर क्याम्पका रूपमा कालिपोखरी जान थालेको स्थानीयवासीसमेत रहनुभएका नेपाल पत्रकार महासङ्घ रोल्पाका निवर्तमान अध्यक्ष महेश न्यौपानेले बताउनुभयो ।
हप्ताभरको कोलाहल वातावरणमा काम गर्ने कर्मचारी एक रात एकान्तमा बसेर आराम गर्ने स्थानका रुपमा यसलाई लिन थालेको उहाँको भनाइ छ । हप्ताभरको कार्यबोझले तनाव भएको मनस्थिति र शरीरलाई आराम दिन आफू नाइट फायर क्याम्पका लागि साथीसँग कालिपोखरी पुगेको होलिभिजन आवासीय मावि लिवाङका शिक्षक सुवास लामिछानेले जानकारी दिनुभयो ।
कालिपोखरीको आनन्दमोहक दृश्य र वातावरणले हप्ताभरको तनाव बिर्साइदिने गरेको उहाँको भनाइ छ । हप्तामा एक दिन यसरी नाइट फायर क्याम्पमा जाँदा अघिल्लो हप्ताको तनाव बिर्साउनुका साथै आगामी हप्ताको कामका लागि ऊर्जा मिलेको महसुस भएको कालिपोखरी पुगेका अर्का शिक्षक विराट केसीले भन्नुभयो ।
समुद्र सतहदेखि दुई हजार १०० मिटरको उचाइमा रहेको सो स्थानबाट सूर्योदय र सूर्यास्तको मनमोहक दृश्य देखिनुका साथै साविक राप्ती अञ्चलका सबै जिल्ला दृश्यावलोकन गर्न सकिने कालिपोखरी पर्यटन विकास समितिका अध्यक्ष खिमप्रसाद न्यौपानेले बताउनुभयो । पर्यापर्यटनको दृष्टिकोणले राम्रो सम्भावना बोकेको सो क्षेत्रको विकासका लागि अघिल्लो वर्ष रोल्पा नगरपालिकाले केही बजेटसमेत खर्च गरिसकेको छ । पर्यटकीय क्षेत्रको आधारभूत संरचना निर्माणका लागि रोल्पा नगरपालिका–४ ले केही बजेटसमेत विनियोजन गरेको अध्यक्ष न्यौपानेको भनाइ छ ।
जिल्ला सदरमुकामदेखि सबैभन्दा नजिकको दूरीमा रहेको सो क्षेत्र आन्तरिक पर्यटकको रोजाइमा पर्दै गएको बताइएको छ । विशेषगरेर शुक्रबार राति नाइट फायर क्याम्पको रूपमा र शनिबार दिउँसो पर्यावरणीय आनन्द लिन पर्यटक कालिपोखरी पुग्ने गरेको कालिपोखरी पर्यटन विकास समितिका सचिव ब्रेकफास्ट कुइक न्यौपानेले जानकारी दिनुभयो ।