अब अमेरिकी पासपोर्ट ५ देखि ७ हप्तामै, आपतकालिन यात्रामा शीघ्र अप्वाइन्टमेन्ट
प्रकाशित मिति : कार्तिक १५, २०७८ सोमबार
अमेरिकी सरकारको विदेश मन्त्रालयले नयाँ पासपोर्टको आवेदन प्रकृयामा लैजाने मिति घटाएको छ । कोरोना महामारीका कारण पासपोर्ट प्राप्त गर्न लामो समय लाग्दै आएकोमा अबदेखि अमेरिकी पासपोर्ट विगतको तुलनामा छिटो प्राप्त गर्न सकिनेछ ।
अतिरिक्त ६० डलर तिरेर आवेदनलाई शीघ्र प्रकृयामा लगेको खण्डमा ५ देखि ७ हप्ताभित्र पासपोर्ट प्राप्त गर्न सकिनेछ । नियमित पासपोर्ट आवेदनका सन्दर्भमा भने ८ देखि ११ हप्ताभित्र पासपोर्ट प्राप्त गर्न सकिनेछ ।
पासपोर्ट आवेदन हुलाकमार्फत पठाएको मिति वा स्थानीय पासपोर्ट आवेदन केन्द्रमा आवेदन बुझाएको मितिदेखि नभई अमेरिकी विदेशमन्त्रालयको पासपोर्ट एजेन्सी वा सेन्टरमा आवेदन प्राप्त भएको मितिबाट दिनको गणना गरिने जनाइएको छ । अमेरिकी विदेश मन्त्रालयले आफूहरु अतिशीघ्र पासपोर्ट आवेदन प्रकृयामा लैजानेमा प्रतिबद्ध रहेको जनाएको छ ।
अक्टोबरको सुरुमा नियमित आवेदनका सन्दर्भमा १४ हप्तासम्म र अतिरिक्त शुल्क तिरेर तीब्र प्रकृयाको आवेदनका सन्दर्भमा १० हप्तासम्म लाग्ने गरेको बताइएको थियो । जुलाई र अगस्तमा ब्याकलगका कारण ६० डलर अतिरिक्त शुल्क तिरेको खण्डमा १२ हप्ताभित्र र नियमित आवेदनका सन्दर्भमा १८ हप्ताभित्र पासपोर्ट आवेदन प्रकृयामा लगिदै आएको थियो । महामारीभन्दा अगाडि नियमित आवेदनका सन्दर्भमा पनि ६ देखि ८ हप्ताभित्र पासपोर्ट प्राप्त गरिदै आएको थियो ।
आवेदकले आपतकालिन यात्राका सन्दर्भमा शीघ्र अप्वाइन्टमेन्टका लागि पनि अनुरोध गर्न सक्नेछन् । आपतकालिन रुपमा अप्वाइन्टमेन्ट लिन चाहनेहरुले राष्ट्रिय पासपोर्ट सुचना केन्द्रको १ ८७७ ४८७ २७७८ नम्बरमा विहान ८ बजेदेखि राती १० बजेसम्म फोन गरेर अप्वाइन्टमेन्ट लिन सक्नेछन् । तर त्यसका लागि जीवन र मृत्युको आपतकालिन अवस्था भएको हुनुपर्नेछ ।