सीडीसीका भ्याक्सिन सल्लाहकारहरुबाट मोडेर्ना र जोन्सन एण्ड जोन्सनको बुस्टर डोज सिफारिस
प्रकाशित मिति : कार्तिक ४, २०७८ बिहीबार
नेपालमा जोन्सन एण्ड जोन्सन भ्याक्सिन लगाइदै
अमेरिकन सीडीसीका भ्याक्सिन सल्लाहकारहरुले मोडेर्ना र जोन्सन एण्ड जोन्सनको बुस्टर डोज सिफारिस गरेका छन् । सीडीसीले ती भ्याक्सिनको बुस्टर डोजका लागि एफडीएको स्वीकृतिलाई मान्यता दिएको हो ।
सीडीसीका सल्लाहकार सदस्यहरु जोन्सन एण्ड जोन्सनको भ्याक्सिन लगाएकाहरुलाई दोश्रो डोज आवश्यक भएको निष्कर्षमा पुगेका छन् । मोडेर्ना र फाइजरको तुलनामा संक्रमण रोक्न कम प्रभावकारी रहेको जोन्सन एण्ड जोन्सनको दोश्रो डोज लगाउँदा उल्लेख्यमात्रामा काम गरेको अध्ययनले देखाएको छ ।
सीडीसीले कस्ता व्यक्तिले बुस्टर डोज लिने लगायतका सन्दर्भमा विस्तृत निर्देशिका जारी गर्ने भएको छ । साथै मान्छेहरुले भ्याक्सिनका डोजहरु मिसाउन हुने वा नहुने भन्ने सन्दर्भमा पनि निर्देशिका जारी गरिने जनाइएको छ ।
एफडीएले बुधबारमात्र मोडेर्ना र जोन्सन एण्ड जोन्सनको जान्सेन भ्याक्सिनको बुस्टर डोजका लागि स्वीकृति दिएको थियो । एफडीएले भ्याक्सिनको मिश्रणका लागि पनि स्वीकृति दिएको थियो । सुरुमा जुनसुकै भ्याक्सिनको डोज लिएको भएतापनि योग्य व्यक्तिले बुस्टर डोजका रुपमा फरक भ्याक्सिन लिनसक्नेगरी एफडीएले स्वीकृति प्रदान गरेको हो ।
मोडेर्ना भ्याक्सिनको दोश्रो डोज लगाएको ६ महिना नाघेका, ६५ बर्षमाथिकाहरु, उच्च जोखिममा रहेका १८ बर्षमाथिकाहरु लगायतलाई मोडेर्नाको बुस्टर डोज स्वीकृत गरिएको छ । फाइजरको बुस्टर डोज पनि यही श्रेणीका व्यक्तिलाई सिफारिस गरिएको थियो । त्यस्तै एफडीएले जोन्सन एण्ड जोन्सनको भ्याक्सिन लगाएको २ महिना नाघेका सबैलाई दोश्रो डोज स्वीकृत गरेको छ ।