एफडीएको सल्लाहकार प्यानलबाट मोडेर्नाको बुस्टर डोज एकमतले सिफारिस
प्रकाशित मिति : आश्विन २८, २०७८ बिहीबार
अमेरिकाको खाद्य तथा औषधी प्रशासन एफडीएको सल्लाहकार प्यानलले ६५ बर्षभन्दा माथिका व्यक्ति वा उच्च जोखिममा रहेकाहरुका लागि कोरोनाबिरुद्धको भ्याक्सिन मोडेर्नाको बुस्टर डोजका रुपमा तेश्रो डोज सिफारिस गरेको छ । एफडीएको सल्लाहकार समितिले एकमतले यस्तो निर्णय पारित गरेको हो ।
यसअगाडि एफडीएले फाइजर भ्याक्सिनको बुस्टर डोज स्वीकृत गरेको थियो । सल्लाहकार प्यानलको निर्णयपछि अब केहीदिनमा नै एफडीएले मोडेर्नाको बुस्टर डोज स्वीकृतिका लागि निर्णय लिने अपेक्षा गरिएको छ । सीडीसीको भ्याक्सिन सल्लाहकार समितिमा पनि यसबारे आगामी साता मतदान हुने अपेक्षा गरिएको छ ।
मोडेर्नाले बुस्टर डोजका लागि एफडीएसमक्ष सेप्टेम्बर १ मा आवेदन दिएको थियो । मोडेर्नाले बुस्टर डोजका लागि पहिलो र दोश्रो डोजको तुलनामा आधामात्र अर्थात् ५० माइक्रोग्राम भ्याक्सिन प्रयोग गर्नेछ । स्वीकृत भइसकेपछि मोडेर्नाले स्वास्थ्य सेवा प्रदायकलाई बुस्टर डोजको फरकबारे व्याख्या गरेर पत्र पठाउनेछ ।
अमेरिकामा ६५ बर्षभन्दा माथिकालाई र उच्च जोखिममा रहेकाहरुलाई कोरोनाबिरुद्धको भ्याक्सिन फाइजरको तेश्रो बुस्टर डोज दिने दिइदै छ । ६५ बर्षभन्दा माथिका, दीर्घकालिन हेरचाह केन्द्रमा रहनेहरु र स्वास्थ्य समस्या भएका निश्चित व्यक्तिलाई फाइजरको बुस्टर डोज स्वीकृत छ ।
त्यस्तै ५० बर्ष वा त्योभन्दा माथिका उच्च जोखिममा रहेका क्यान्सर, स्ट्रोक, मृगौला रोग, मधुमेह, मुटुरोग लगायतबाट पीडितहरुका लागि पनि बुस्टर डोज स्वीकृत छ । तर १८ देखि ४९ बर्षसम्मका उक्त समुहका व्यक्तिका लागि पनि बुस्टर डोज स्वीकृत छ ।