पूर्ण खोप पाउने दरमा नेपालले भारतलाई समेत उछिन्याे
प्रकाशित मिति : आश्विन २१, २०७८ बिहीबार
दक्षिणपूर्वी एशियाली मुलुकहरुमा पूर्ण खोप पाउने दरमा नेपालले भारतलाई समेत उछिनेको छ। विश्वस्वास्थ्य संगठनको पछिल्लो तथ्यांकअनुसार प्रति १ सय जनामा पूर्ण खोप पाउने दरमा भारतभन्दा नेपाल अगाडि देखिएको हो।
दक्षिणपूर्वी एशियाली मुलुकमा प्रति १ सय जनामा पूर्ण खोप पाउनेमा सबैभन्दा अगाडि भुटान रहेको छ। त्यहाँ प्रति सयमा ६५.९० जनाले पूर्ण खोप पाएका छन्। छैटौं नम्बरमा रहेको नेपालमा प्रति सयमा २१.२६ जनाले र आठौं नम्बरमा रहेको भारतमा १७.९१ जनाले पूर्ण खोप पाएका छन्।
दोस्रो नम्बरमा रहेको माल्दिभ्समा ६१.८०, श्रीलंकामा ५४.३१, थाइल्याण्डमा ३२.६३ र टिमोर लेस्टेमा २२.६० जनाले पूर्ण खोप पाएका छन्। यस्तै, इण्डोनेशियामा २०.१०, बंगलादेशमा १०.२० र म्यानमारमा प्रति सय जनामा ७.०४ जनाले पूर्ण खोप पाएका छन्। समग्रमा दक्षिणपूर्वी एशियाली मुलुकमा प्रतिसय जनामा १७.९९ जनाले पूर्ण खोप पाएको डब्लुएचओको तथ्यांकमा उल्लेख छ।
डब्लुएचओका अनुसार नेपालमा हालसम्म १ करोड ४३ लाख ८२ हजार १ सय २७ जनाले पहिलो तथा दोस्रो डोज लगाएका छन्। जसमध्ये पहिलो डोज लगाउनेको संख्या ७९ लाख ६२ हजार ६ सय ४७ छ भने दुवै डोज लगाउनेको संख्या ६४ लाख १९ हजार ४ सय ८० छ। यो अक्टोबर ६ सम्मको तथ्यांक हो।
स्वास्थ्य मन्त्रालयको तथ्यांकअनुसार पछिल्लो २४ घण्टामा नेपालमा ५७ हजार १ सय ५८ जनाले खोप लगाएका छन्। योसँगै ७ अक्टोबरसम्म नेपालमा ८० लाख ८ हजार ८ सय ५४ जनाले पहिलो डोज र ६४ लाख ३० हजार ४ सय ३१ जनाले दोस्रो डोज खोप लगाएका छन्।
यस क्षेत्रमा सबैभन्दा कम खोप लगाएको मुलुक म्यानमारमा हालसम्म ८३ लाख ९० हजार ७ सय ४६ जनाले एक डोज र ३८ लाख ७२ हजार ९ सय ५६ जनाले दुवै डोज लगाएका छन्। प्रति सय जनसंख्यामा म्यानमारको दर दक्षिणपूर्वी एशियाली मुलुकमा सबैभन्दा कम हो।
नेपालमा हाल चिनियाँ खोप भेरोसेल, भारतमा निर्मित कोभिशिल्ड, जापानको एस्ट्राजेनेका, स्वीडेनको एस्ट्राजेनेका र अमेरिकाको जोन्सन एण्ड जोन्सन खोप लगाइएको छ।