क्यानडामा भ्याक्सिन नलगाए ट्रेन र विमान चढ्न नपाइने, भ्याक्सिन नलगाउने कर्मचारीलाई विदा
प्रकाशित मिति : आश्विन २०, २०७८ बुधबार
क्यानाडा भित्र ट्रेन र हवाई यातायातमा १२ बर्ष वा सोभन्दा माथिका सबैलाई भ्याक्सिन अनिवार्य गरिएको छ । प्रधानमन्त्री जस्टिन टु्रडोले देशभर ट्रेन र हवाई यातायातमा कर्मचारीहरुसहित १२ बर्ष वा सोभन्दा माथिका सबैका लागि भ्याक्सिन अनिवार्य गरिएको घोषणा गरेका हुन् ।
बुधबार गरिएको घोषणामा ट्रेन र विमानबाट यात्रा गर्ने सबैका लागि एवं संघीय कर्मचारीहरुका लागि भ्याक्सिन अनिवार्य गरिएको हो । संघीय नियन्त्रण रहेका अन्य कामदारहरुका सन्दर्भमा पनि क्यानडाले यसै महिनाको अन्तिमदेखि भ्याक्सिन अनिवार्य गर्ने तयारी गरेको छ ।
क्यानडाभित्र चल्ने ट्रेन र विमानमा चढ्नका लागि कोरोनाबिरुद्धको भ्याक्सिन लगाएको हुनुपर्ने नियम अक्टोबरको अन्तिमबाट कार्यान्वयन हुनेछ भने केही समयका लागि छुट अवधि दिइने प्रधानमन्त्री टु्रडोले बताएका छन् । छुट अवधिमा यात्रु र कर्मचारीहरुले कोरोनाको नेगेटिभ रिपोर्ट देखाएर यात्रा गर्न पाउनेछन् ।
नोभेम्बरको अन्तिमदेखि १२ बर्ष वा त्यो भन्दा माथिका व्यक्तिले कोरोनाबिरुद्धको भ्याक्सिन नलगाएको खण्डमा ट्रेन र विमानमा यात्रा गर्न दिइनेछैन । नोभेम्बर अन्तिमदेखि कोरोनाविरुद्धको नेगेटिभ रिपोर्टलाई पनि मान्यता नदिइने भएको छ । स्वास्थ्य अवस्थाका कारणमात्र भ्याक्सिन लगाउन नपाएकाहरुलाई छुट दिइनेछ । तर त्यसको उचित प्रमाण पेश गर्नुपर्नेछ ।
क्यानडाले गरेको यो घोषणा विश्वकै कडामध्येको एक हो । जनतालाई सुरक्षित गर्नका लागि कडा प्रावधानको घोषणा गरिएको प्रधानमन्त्री टु्रडोले बताए । अक्टोबर २९ भित्र सबै संघीय कर्मचारीहरुले भ्याक्सिन लगाइसक्नुपर्ने प्रावधान घोषणा गरिएको छ । अक्टोबर २९ सम्म भ्याक्सिन नलगाउने र भ्याक्सिन लगाएको प्रमाण पेश नगर्ने सरकारी कर्मचारीहरुलाई नोभेम्बर १५ अगाडि नै विना तलब प्रशासनिक विदा दिइनेछ ।
अहिलेसम्म क्यानडामा १२ बर्ष वा सोभन्दा माथिका ८९ प्रतिशतले कोरोनाबिरुद्धको कम्तीमा एकडोज भ्याक्सिन लगाइसकेका छन् । झण्डै ८२ प्रतिशत भ्याक्सिन लगाउन योग्य क्यानेडियनहरुले पूर्णरुपमा भ्याक्सिन लगाइसकेका छन् ।
