क्यालिफोर्नियाको समुन्द्रीतटमा ६ लाख लिटर तेल चुहिंदा ‘पर्यावरण प्रकोप’, मरेका चरा र माछाहरु बगरमा
प्रकाशित मिति : आश्विन १८, २०७८ सोमबार
दक्षिणी क्यालिफोर्नियाको तटको एउटा हिस्सा झण्डै झण्डै ६ लाख लिटर तेलले ढाकिंदा बन्यजन्तुको बासस्थान क्षतिग्रस्त भएको छ भने कैयन मरेका चरा र माछाहरु पानीले बगरमा ल्याएको छ । हंग्टिंटन समुन्द्री तटभन्दा झण्डै ५ माइलको दुरीमा तेलको पाइपलाइन चुहिंदा तेल समुन्द्रमा मिसिएको छ ।
अहिलेसम्म चुहिएर पानीमा मिसिएको कुल १२१८ ग्यालेन मिश्रण निकालिएको छ भने चुहिएको कच्चा तेलको मिश्रण सबै निकालिएको घोषणा नभएसम्म उक्त क्षेत्रमा रहेको तेल हटाउने कार्य जारी रहनेछ । बगरमा छरिएका मृत चरा र माछाहरु समेत निकाल्ने काम भइरहेको छ ।
तेलमा भिजेको एउटा रातो हाँसको उद्दार गरिएको छ भने उसले पशु चिकित्सा हेरचाह प्राप्त गरिरहेको छ । तेलबाट प्रभावित अन्य बन्यजन्तुहरुको पनि अनुसन्धान भइरहेको छ । चुहिएको तेल हग्टिंटन समुन्द्री तट र न्युपोर्ट समुन्द्री टलमा फैलिएको छ ।
शनिबार विहान ९ बजेतिर पहिलोपटक तेल चुहिएको देखिएको थियो । युएस कोस्ट गार्डलाई शनिबारमात्र रिपोर्ट गरिएपनि यसभन्दा अगाडिदेखि नै उक्त क्षेत्रमा तेल चुहिएको हुनसक्ने जनाइएको छ । पानीमा उत्रिएको र मिसिएको तेलको चमक देखिएपछि अनुसन्धान सुरु गरिएको थियो ।
आइतबार विहानसम्म पनि चुहावट पूर्णरुपमा रोकिएको थिएन । चुहावट रोक्न प्राथमिक मर्मत गरिएपनि त्यहाँ अतिरिक्त मर्मत आवश्यक भएको जनाइएको छ । ५ दशमलव ८ समुन्द्री माइलमा चुहिएको तेल फैलिएको जनाइएको छ ।