गैरकानूनीरुपमा साउदी छिर्न खोज्ने ७ यमनी मारिए, कम्तीमा २६ जना घाइते
प्रकाशित मिति : आश्विन १७, २०७८ आईतबार
साउदी अरब छिर्न खोज्ने सात जना यमनी आप्रवासी साउदी अरबको सीमाक्षेत्रमा मारिएका छन् । ती आप्रवासीहरु जबर्जस्ती साउदी अरब छिर्न खोजेको बताइएको छ ।
सीमा सुरक्षा बल र हुथीबीचको भिडन्तमा क्रसफायरमा परेर ती आप्रवासीहरु मारिएका बताइएको छ । शुक्रबार यमनको मोनाबिह जिल्लामा ती आप्रवासी मारिएका हुन् ।
सीमामा पर्ने सो उपत्यकाबाट उनीहरु साउदी अरेबिया जान खोज्दै थिए । त्यसक्रममा कम्तीमा २६ जना घाइते भएको बताइएको छ । घाइतेहरुलाई यमनी अस्पतालमा भर्ना गरिएको छ । शुक्रबार ५ वटा शव र २१ जना घाइेतहरुलाई त्यहाँबाट उठाइएको थियो भने शनिबार विहान २ वटा शव र ५ जना अरु घाइतेहरुलाई उठाइएको थियो । उनीहरु हुथी र साउदी सेनाबीचको भीडन्तका क्रममा भएको गोलीबारीमा परेको जनाइएको छ ।
उक्त उपत्यकाबाट साउदी छिर्न खोज्ने कैयौँ आप्रवासीहरु र प्रहरीका बीचमा केही दिनयता भिडन्तहरु हुने गरेका छन् । घटनाबारे त्यहाँबाट यमनको राजधानी साना फर्किएका प्रत्यक्षदर्शीले खुलासा गरेका हुन् । उनीहरु खाली खुट्टा नै साउदी छिर्न खोजेका थिए ।
यमनमा मानवीय संकट
सिमाक्षेत्रमा यस्ता घटनाहरु बारम्बार हुने गरेका छन् । सातबर्षयता यमनमा गृहयुद्ध चर्किएदेखि सादा प्रान्तको मोनाबिह गैरकाननीरुपमा साउदी छिर्ने सबैभन्दा व्यस्त विन्दु बनेको छ । अर्को घटनामा उत्तरी यमनी प्रान्त हिजाहमा सार्वजनिक बिदा मनाइरहेकाहरुमाथि हुथीको मिसाइल प्रहार हुँदा कम्तीमा ६ जनाको ज्यान गएको छ । घटनामा २० जनाभन्दा धेरै घाइते भएका छन् ।
यमनमा अहिले विश्वकै खराबमध्येको मानवीय संकट रहेको छ । झण्डै २१ मिलियन व्यक्तिलाई सहायताको आवश्यकता छ , जसमा ११ मिलियन भन्दा बढी बालबालिकाहरु रहेका छन् । मार्च २०१५ मा गृहयुद्ध सुरुभयदेखि यमन बालबालिकाहरुका लागि नारकीय बनेको छ ।
आधामात्र स्वास्थ्य संस्थाहरु संचालनमा रहेका छन् भने अधिकांशमा साधनश्रोतको अभाव रहेको छ । मास्क, ग्लोभ, अक्सिजन लगायत कोरोनाको उपचारका लागि आवश्यक बस्तुहरुको अभाव रहेको छ । कैयन स्वास्थ्यकर्मीहले तलब पाउन सकेका छैनन् ।
युद्धमा बालबालिकाहरु मारिने र घाइते हुने क्रम पनि जारी रहेको छ । कैयन विद्यालय र स्वास्थ्य संस्थाहरु क्षतिग्रस्त हुनुका साथै बन्द रहेका छन् । एउटा विश्लेषण अनुशार ५ बर्षभन्दा कम उमेरका २३ लाख यमनी बालबालिकाहरु सन् २०२१ भरमा कुपोषणको शिकार हुने अनुमान गरिएको छ । त्यसमध्ये झण्डै ४ लाख कडा प्रकारको कुपोषणको शिकार हुने र समयमै उपचार नपाए ज्यान जाने खतरा रहेको छ ।