कोरोनाबिरुद्धको खानेचक्की अस्पताल भर्ना हुने दर रोक्न ५० % प्रभावकारी, प्रयोगको आवेदन दिइने
प्रकाशित मिति : आश्विन १६, २०७८ शनिबार
कोरोनाको उपचारका लागि परीक्षणमा रहेको चक्की मृत्युदर र अस्पताल भर्ना हुने दर रोक्न उच्च रुपमा प्रभावकारी भएको अध्ययनले देखाएको छ । आधाभन्दा धेरै मृत्यु र अस्पताल भर्ना हुने दर रोक्न चक्की प्रभावकारी रहेको पाइएको छ ।
यदि अमेरिकाको खाद्य तथा औषधी प्रशासन एफडीएबाट आपतकालिन प्रयोगको अनुमति पाएको खण्डमा कोरोनाबिरुद्ध लड्न सेवन गर्ने प्रकारको यो पहिलो औषधी हुनेछ । अमेरिकाको मेर्क एण्ड रिजबैक बायोथेराप्युटिक्सटले बनाएको यो औषधी छिट्टै आपतकालिन प्रयोगका लागि अमेरिकाको एफडीए समक्ष आवेदन दिने तयारी भइरहेको कम्पनीले जनाएको छ ।
मोल्नुपिराविर नामको यो औषधीको सेवन गर्दा मृत्यु र अस्पताल भर्ना हुने दरमा ५० प्रतिशतभन्दा धेरैले कमी आएको कम्पनीले जनाएको हो । यो औषधी सेवन गरेका बिरामीहरुमध्ये ७ दशमलव ३ प्रतिशतमात्र अस्पताल भर्ना हुने अवस्था आएको थियो । औषधी दिइएका कसैको पनि मृत्यु भएको थिएन । प्लासिबो अर्थात् औषधी नमिसाइकन ट्याब्लेट दिइएका ८ जनाको भने मृत्यु भएको थियो ।
शुरूमा इन्फ्लुएन्जा उपचारका लागि विकास गरिएको यो औषधीले भाइरसको जेनेटिक कोडमा परिवर्तन ल्याइदिने गरी डिजाइन गरिएको छ जसले भाइरस शरीरमा फैलनबाट रोक्छ। कोभिड खोपमा भाइरसको बाहिर रहेको स्पाइक प्रोटिनलाई निशाना बनाइन्छ भने खाने चक्कीमा भाइरसले सङ्ख्या बढाउने इन्जाइमलाई नै निशाना बनाएको हुन्छ।
मर्क कोभिड विरुद्धको खाने चक्कीको परीक्षण परिणाम सार्वजनिक गर्ने पहिलो कम्पनी हो। अरू कम्पनीहरू पनि खानेचक्कीबारे परीक्षण गरिरहेका छन्। मर्कले सन् २०२१ को अन्त्यसम्ममा १ करोड चक्की उत्पादन गरिसक्ने बताएको छ। एफडीएबाट अनुमति पायो भने अमेरिकी सरकारले उक्त औषधी १२ अर्बको खरिद गर्ने सहमति गरिसकेको छ।