युरोपको इतिहासमा नै पहिलो पटक आइसल्यान्डको नयाँ संसदमा महिलाको बहुमत
प्रकाशित मिति : आश्विन १०, २०७८ आईतबार
युरोपको इतिहासमा नै पहिलो पटक संसदमा महिलाको बहुमत कायम गर्दै आइसल्याण्डले नयाँ इतिहास रचेको छ । आइसल्यान्डको नयाँ संसदमा आधाभन्दा बढी सिटमा महिला सदस्य विजयी बनेपछि यो इतिहास रचिएको हो ।
आइतबार सार्वजनिक गरिएको अन्तिम चुनावी परिणाम अनुशार आइसल्याण्डको संसद अल्थिङका ६३ सिटमध्ये ३३ सिट अर्थात् ५२ दशमलव ३८ प्रतिशत सीटमा महिलाको विजयी भएका छन् ।
प्रधानमन्त्री क्याथरिन ज्याकोब्सडोटिरले नेतृत्व गरेको गठबन्धनले ३७ सिटमा विजय प्राप्त गरेको छ जुन अघिल्लो चुनावको तुलनामा २ सिट बढी हो । जसका कारण यही शक्तिकै निरन्तरता हुने देखिएको छ ।
अहिलेसम्म अन्य कुनै पनि युरोपेली मुलुकमा ५० प्रतिशतभन्दा बढी महिला कानून निर्माण गर्ने तह संसदमा पुगेका छैनन् । यस पहिले स्वीडेनमा ४७ प्रतिशतको नजिक महिला सांसदको प्रतिनिधित्व बनाउन सफल भएपनि उक्त रेकर्डलाई आइसल्याण्डले तोडिदिएको छ ।