न्युयोर्कको प्रोन्टो पिज्जाबाट बिक्रि भएको मेगा मिलियन टिकटले जित्यो ४३२ मिलियन डलर
प्रकाशित मिति : आश्विन ६, २०७८ बुधबार
न्युयोर्कको ४८ स्ट्रीट र ६ एभिन्युमा रहेको प्रोन्टो पिज्जाबाट बिकेको मेगा मिलियन लोटरी टिकटले ४३२ मिलियन डलर जितेको छ । मंगलबार रातीको मेगा मिलियन लोटरीमा उक्त टिकटका सबै ६ वटा नम्बरहरु मिलेका छन् ।
न्युयोर्कको म्यानहटन रकफेलर सेन्टर नजिकै रहेको उक्त टिकटका नम्बरहरु ३६, ४१, ४५, ५१ र ५६ रहेका थिए भने मेगाबल १३ रहेको थियो । ३०२ मिलियन टिकटमा जित्ने सम्भावना १ रहेपनि उक्त टिकटले ४३२ मिलियन डलर जितेपछि विजेताले एकमुष्ठ रकम लिन चाहेको खण्डमा ३१५ मिलियन डलर प्राप्त गर्न सक्नेछन् । साथै किस्तामा पनि उक्त रकम लिन सकिनेछ ।
न्युयोर्कमा लोटरी जित्नेलाई अज्ञात बस्न अनुमति छैन । त्यसैले लोटरी जित्ने व्यक्ति सार्वजनिक हुनुपर्छ । तर सन् २०१९ मा लङ आइल्याण्डको २३ जनाको एउटा समुहले एलएलसीको प्रयोग गरेर ४३७ मिलियन डलर अज्ञात रुपमा नै लिएको थियो ।
मंगलबार राती कनेक्टिकटमा बिक्रि भएको एउटा टिकटले पनि १ मिलियन डलर जितेको छ । अन्तिमपटक कसैले मेगा मिलियन जितेको गत जुनमा थियो । न्युयोर्कमा यो बर्ष अर्को एकजनाले पनि मेगा मिलियन जितेका थिए । गत फरबरीमा अपस्टेट बस्ने एउटा जोडीले ९६ मिलियन डलर जितेको थियो ।
यो बर्षको सबैभन्दा ठूलो रकम भने गत जनवरीको थियो । त्यतीबेला मेगा मिलियन १ बिलियन डलर पुगेको थियो । जुन टिकट मिसिगनमा बिक्रि भएको थियो । आगामी शुक्रबारका लागि २० मिलियनको मेगा मिलियन ज्याकपट तय भएको छ ।