Follow @khasokhasmag

राष्ट्रसंघको महासभामा सहभागी ब्राजिलका स्वास्थ्य मन्त्री कोरोना सङ्क्रमित, न्युयोर्कमै आइसोलेसनमा


प्रकाशित मिति : आश्विन ६, २०७८ बुधबार

ब्राजिलका स्वास्थ्य मन्त्री मार्कोलो क्वैरोगा कोरोनाभाइरसबाट सङ्क्रमित भएका छन् । संयुक्त राष्ट्रसंघको महासभामा सहभागी भएपछि उनलाई सङ्क्रमण पुष्टि भएको जनाइएको छ ।

राष्ट्रपति जैर बोल्सोनारोको नेतृत्वमा ब्राजिलको टोली अमेरिकाको न्युयोर्कमा भएको राष्ट्रसंघको महासभामा सहभागी भएको हो ।टोलीमा सहभागी अन्य सदस्यहरुको पनि कोरोना परीक्षण गरिएको, तर सङ्क्रमण नदेखिएको अधिकारीहरुले जनाएका छन ।

ब्राजिल सरकारले जारी गरेको वक्तव्यका अनुसार अहिले सङ्क्रमित स्वास्थ्य मन्त्री क्वैरोगाले कोरोना भाइरसविरुद्धको खोप पनि लगाएक थिए । राष्ट्रसंघको महासभामा सहभागी भएका मध्ये सङ्क्रमित हुनेमा उनी ब्राजिलियन डेलिगेटमा दोस्रो व्यक्ति हुन् ।

सङ्क्रमित ५५ बर्षीय स्वास्थ्यमन्त्री क्वैरोगा न्युयोर्कमै आइसोलेसनमा बसेको जनाइएको छ । तर टोलीमा सहभागी भएर पनि सङ्क्रमण पुष्टि नभएका अन्य भने ब्राजिल फर्किसकेका छन् ।

कोरोनाबिरुद्धको भ्याक्सिन लगाउन अस्वीकार गर्दै आएका ब्राजिलका राष्ट्रपति जायर बोल्सोनारो यात्राका क्रममा मास्क बिना देखिएका थिए भने उनले अहिलेसम्म पनि खोप लगाएका छैनन् । स्वास्थ्यमन्त्री क्वैरोगासँगै रहेका बोल्सोनारोले महासभाका क्रममा अन्य देशका शिर्ष नेताहरुसँग पनि भेटवार्ता गरेका थिए । तर अहिलेसम्म पनि उनीहरुलाई सङ्क्रमण भएको जानकारी नआएको वक्तव्यमा उल्लेख गरिएको छ ।

बोल्सोनारोले राष्ट्रसंघको महासभा बैठकमा गरेको सम्बोधनका क्रममा भने आफू कोरोना महामारीबिरुद्ध लड्न चाहेको बताएका थिए । कोरोना महामारीको सामना गर्ने सन्दर्भमा आलोचना खेप्दै आएका उनले कोरानाले आश्चर्यजनक रुपमा सन् २०२० मा सबैलाई समातेको आफ्नो सम्बोधनका क्रममा बताएका थिए ।

आफूले कोरोनाबिरुद्ध र बेरोजगारीबिरुद्ध एकै समयमा उत्तिकै उत्तरदायीत्वका साथ लड्नुपर्ने विषयमा वकालत गर्दै आएको उनले बताएका थिए । उनले लकडाउनका मापदण्डले विश्वमा खासगरी खाद्यान्नमा मुद्रास्फीतिको विराशत छाडेको बताए । सन् २०२० मा ब्राजिलमा गभर्नर र मेयरहरुले लागु गरेको लकडाउनका कारण घरमा बस्नुपरेका र आम्दानी गुमाएकाहरुलाई ८ सय डलरका दरले सहयोग उपलब्ध गराइएको राष्ट्रपति बोल्सोनारोले बताए ।

राष्ट्रपति बोल्सोनारो पटकपटक लकडाउनकाबिरुद्ध बोल्दै आएका थिए । जसका कारण ब्राजिलका स्थानीय सरकारहरुले उनको कडा आलोचना समेत गर्दै आएका थिए । साओ पाउलोका गभर्नर जोआ डोरियाले राष्ट्रपति बोल्सोनारोको कडा आलोचना गरेका थिए । यद्यपी राष्ट्रपति बोल्सोनारोले यो बर्षको नोभेम्बरसम्म कोरोनाबिरुद्धको भ्याक्सिन लगाउन चाहने नागरिकहरुलाई निशुल्क उपलब्ध गराइने बताएका छन् ।

आफ्नो सरकार भ्याक्सिन अभियानमा बृहत तरिकाले सहभागिता नजनाएको स्वीकार गर्दै राष्ट्रपति बोल्सोनारोले आफूले भ्याक्सिनबारेका प्रयासहरुको समर्थन गर्ने बताएका छन् । उनले भने – ‘हाम्रो सरकारले भने भ्याक्सिन वा स्वास्थ्य पासपोर्ट वा भ्याक्सिन सम्बन्धित अन्य कुनै दायित्वहरुलाई समर्थन गरेको छैन ।’

(रासस/एएफपीको समाचारमा विवरण थप गरिएको ।फोटो एपी/एएफपी)

 

 

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com